حوزہ نیوز ایجنسی کی رپورٹ کے مطابق، بانی انقلابِ اسلامی رہبر کبیر حضرت امام خمینیؒ کی 36 ویں برسی کی مناسبت سے مدرسہ خاتم النبیینؐ کوئٹہ پاکستان میں ایک عظیم الشان کانفرنس بعنوان "مظلوم فلسطین کی حمایت میں امام خمینیؒ کا کردار" منعقد ہوئی، جس میں شیعہ سنی علمائے کرام نے شرکت اور خطاب کیا۔
کانفرنس کا آغاز امام خمینیؒ اور شہدائے فلسطین کے درجات کی بلندی کے لیے قرآن خوانی سے کیا گیا۔
کانفرنس سے خطاب کرتے ہوئے مولانا ہدایت الرحمن بلوچ (صدر ملی یکجہتی کونسل بلوچستان و امیر جماعت اسلامی بلوچستان، ایم پی اے) نے کہا کہ امام خمینیؒ کا نام مظلوموں کے دفاع، استقامت، اور اسلامی غیرت کی علامت ہے۔ آپ نے انقلاب اسلامی کے ذریعے نہ صرف ایران کو بیدار کیا بلکہ پوری دنیا کے مظلوموں خصوصاً فلسطینی عوام کے لیے آواز بلند کی۔
سید ابو الحسن میری (ڈائریکٹر جنرل خانہ فرہنگ اسلامی جمہوریہ ایران، کوئٹہ) نے کہا کہ امام خمینیؒ نے انقلاب سے قبل ہی 1963 میں فلسطین کی تحریک کی حمایت کی۔ آپ نے فلسطینی عوام کو صبر، جہاد، اور استقامت کا راستہ دکھایا۔ انہوں نے اسرائیل اور بھارت کے گٹھ جوڑ کو امت مسلمہ کے لیے خطرناک سازش قرار دیا۔
علامہ مقصود علی ڈومکی (مرکزی سیکریٹری نشر و اشاعت، مجلس وحدت مسلمین پاکستان) نے کہا کہ امام خمینیؒ نے قرآن کے سیاسی و فکری تصورات کو عملی میدان میں نافذ کیا۔ آپ نے عالم اسلام کو عالمی استعمار کے خلاف قیام کا پیغام دیا، اور "یوم القدس" کا اعلان کر کے فلسطین کو عالمی اسلامی مسئلہ بنا دیا۔
کانفرنس کے دیگر مقررین میں علامہ شیخ ولایت حسین جعفری (نائب صدر، ایم ڈبلیو ایم بلوچستان)، مولانا محمد عارف دمڑ (رہنما جماعت اسلامی بلوچستان)، مولانا چمن علی افضلی (خطیب مسجد صاحب الزمانؑ، کوئٹہ)، سید میر حسین حسینی، علامہ سہیل اکبر شیرازی صوبائی جنرل سیکرٹری ایم ڈبلیو ایم و دیگر شامل تھے۔
تمام مقررین نے امام خمینیؒ کی بصیرت، عالمی سیاسی فہم، اور مظلوم فلسطینیوں کے حق میں آواز بلند کرنے پر انہیں خراجِ عقیدت پیش کیا۔
مقررین نے کہا کہ امام خمینیؒ کا پیغام آج بھی ظلم کے خلاف جدوجہد کرنے والوں کے لیے مشعلِ راہ ہے، اور فلسطین کی آزادی امت مسلمہ کی اجتماعی ذمہ داری ہے۔
آپ کا تبصرہ