حوزہ نیوز ایجنسی کے مطابق، شیعہ علما کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے میڈیا سے گفتگو کرتے ہوئے کہا کہ حکومت زائرین کو تحفظ اور سفری سہولت فراہم کرنے میں ناکام ہو چکی ہے۔ زائرین کے اہم ترین مسئلہ پر حکومت نے انتہائی غیر سنجیدگی کا مظاہرہ کیا۔ جو ناقابل برداشت ہے۔
انہوں نے مزید کہا: حکومت کی جانب سے زائرین امام حسین (ع) کے چہلم میں شرکت کرنے والے زائرین کیلئے زمینی راستوں کی بندش کے خلاف قائد ملت جعفریہ پاکستان علامہ سید ساجد علی نقوی کی زیر قیادت شیعہ علماء کونسل پاکستان کی مرکزی عاملہ کے اجلاس کے متفقہ فیصلوں اور احتجاجی کال کے بعد شیعہ علماء کونسل پاکستان کی جانب سے 5اگست 2025ء سے ملک بھر کے تمام چھوٹے بڑے شہروں میں پر امن احتجاجی مظاہروں کا سلسلہ جاری ہے۔ جس میں ایک بڑی تعداد بلاتفریق شہری احتجاج میں شریک ہیں۔
شیعہ علما کونسل پاکستان مرکزی سیکرٹری جنرل نے کہا: ہم ایک پرامن قوم ہیں، احتجاج کرنا اوراپنے حقوق کے حصول کیلئے آواز بلند کرنا ہمارا بنیادی اور آئینی حق ہے۔ جس سے ہم دستبردار نہیں ہوسکتے۔
انہوں نے میڈیا کو مزید بتایا کہ آج بروز جمعہ8اگست2025ء کو بعد ازاں نماز جمعہ ملک بھر کے تمام چھوٹے بڑے شہروں اور دیہاتوں میں پرامن احتجاجی مظاہرے ہوں گے جس میں ملت جعفریہ کے تمام طبقات بھر پور شرکت کرکے اپنی دینی ،مذہبی و ملی بیداری کا ثبوت فراہم کریں گے۔
علامہ ڈاکٹر شبیر میثمی نے اس بات کا بھی اعادہ کیا کہ اربعین پر جانے والے زائرین کو زمینی راستے فراہم نہ کئے گئے تو عراق میں مشی سے رہ جانے والے زائرین کے ہمراہ پاکستان میں شہر شہر گاؤں گاؤں مشی شروع کرنے کا اعلان کئے جانے کے ساتھ ساتھ چہلم امام حسین علیہ السلام کے جلوسوں کو احتجاجا سڑکوں پر روکے جانے پر بھی غور کر رہے ہیں اور اس پر مشاورت کا سلسلہ جاری ہے۔
انہوں نے کہا: حکومت مسلسل ٹال مٹول کا رویہ اپنا کر زائرین کا وقت ضائع کر رہی ہے، وفاقی وزیر داخلہ کی طرف سے ٹویٹ کے ذریعے راستوں کی بندش کا فیصلہ آٹھ کروڑ شیعہ عوام کی توہین ہے، پاکستان اس طرح نہیں چلے گا تاہم زائرین کے اہم ترین مسئلہ پر حکومت نے انتہائی غیر سنجیدگی کا مظاہرہ کیا، حکمرانوں کے اس سنگین مسئلے پر غیر سنجیدہ رویے نے ہمیں مجبور کر دیا کہ ہم اب عوامی حقوق کے حصول کے لیے احتجاجی راستہ اختیار کریں جس پر عملدآمد کرتے ہوئے ملک بھر میں احتجاجی ریلیاں نکالی جا رہی ہیں۔
آپ کا تبصرہ