حوزہ نیوز ایجنسی کی رپورٹ کے مطابق، امام خمینی رحمۃ اللّٰہ علیہ کے پوتے حجت الاسلام والمسلمین سید حسن خمینی نے قطر پر اسرائیلی حملے کی شدید الفاظ میں مذمت کرتے ہوئے کہا ہے کہ یہ اقدام امریکی حمایت یافتہ اسرائیلی پالیسیوں کا تسلسل ہے، جس کا مقصد مشرقِ وسطیٰ میں مکمل تسلط حاصل کرنا ہے۔
سید حسن خمینی نے زور دیا کہ آج اصل مسئلہ ایران کے ایٹمی یا میزائل پروگرام نہیں، بلکہ اسرائیل کا خطے پر کنٹرول اور طاقت کا حصول ہے، جو تمام سیاسی، فوجی، انسانی اور اخلاقی سرخ لکیر کو عبور کرنے کے مترادف ہے۔
انہوں نے مزید کہا کہ جائز دفاع، قوموں کی جان و عزت کا تحفظ اور سیکورٹی کے بنیادی اصولوں کو مضبوط کرنا انسانی ذمہ داری ہے۔ ان کے مطابق، قطر پر حملہ عالمی برادری کے لیے انتہائی خطرے کی گھنٹی ہے اور یہ اس پالیسی کی عکاسی کرتا ہے جس کے بارے میں امام خمینی رحمۃ اللّٰہ علیہ نے نصف صدی قبل انتباہ کیا تھا۔
سید حسن خمینی نے خبردار کیا کہ لبنان، ایران اور دیگر خطے کے ممالک میں ایسے حملوں کے امکانات موجود ہیں اور اسلامی ممالک کے درمیان حقیقی یکجہتی ہی مشترکہ خطرات کا مؤثر جواب ہے۔
انہوں نے کہا کہ داخلی اختلافات دشمن کا سب سے بڑا موقع ہیں اور صرف اتحاد کے ذریعے ہی یہ خطرات روکے جا سکتے ہیں۔
آپ کا تبصرہ