حوزہ نیوز ایجنسی کی رپورٹ کے مطابق، مرجع عالی قدر حضرت آیۃ اللہ العظمیٰ سید علی الحسینی سیستانی دام ظلہ العالی کی زوجۂ محترمہ کے سانحۂ ارتحال پر ادارۂ تنظیم المکاتب لکھنؤ میں ایک جلسۂ تعزیت و ترحیم منعقد ہوا۔
اس موقع پر حجۃ الاسلام والمسلمین مولانا سید صفی حیدر سکریٹری تنظیم المکاتب نے اس عظیم گھرانے کی عالمہ و فاضلہ خاتون اور عظیم المرتبت مرجع جہانِ تشیع کی شریکِ حیات کے انتقال پر خدمتِ معظم میں تعزیت و تسلیت پیش کی اور ادارہ میں جلسۂ ترحیم کا اہتمام فرمایا۔
مولانا سید صفی حیدر نے اپنے خطاب میں فرمایا کہ مرحومہ کی عظمت کا اندازہ ان کی باوقار، خاضع و خاشع اور اہلِ علم نسل سے بخوبی لگایا جا سکتا ہے۔
جلسہ کی نظامت مولانا سید علی مہذب خرد نقوی نے انجام دی۔ اس موقع پر علماء و ذاکرین کرام میں مولانا سید ممتاز جعفر، مولانا سید تہذیب الحسن، مولانا فیروز علی، مولانا سید صغیر الحسن، مولانا سید راحت حسین، مولانا عسکری عابد، مولانا سید حیدر علی، مولانا سید اصغر عباس اور دیگر علماء کے ساتھ دفترِ تنظیم المکاتب کے اسٹاف اور جامعہ امامیہ تنظیم المکاتب کے طلاب بھی شریک رہے۔
جلسہ میں قرآن خوانی اور سورۂ فاتحہ کے ذریعے مرحومہ کو ایصالِ ثواب کیا گیا۔ آخر میں حضرت آیۃ اللہ العظمیٰ سید علی الحسینی سیستانی دام ظلہ العالی کی صحت و سلامتی اور مرحومہ کے درجات کی بلندی کے لئے دعا کی گئی۔
آپ کا تبصرہ