حوزہ نیوز ایجنسی کی رپورٹ کے مطابق، شیعہ علماء کونسل پاکستان کے مرکزی سیکرٹری جنرل علامہ شبیر حسن میثمی نے گلوبل صمود فلوٹیلا کے امدادی کاروان پر اسرائیلی حملے کے خلاف نماز جمعہ کے بعد قرآن سینٹر کے مقام پر ایک بڑے اجتماع سے خطاب کرتے ہوئے کہا: فلسطین امت مسلمہ کا قبلہ اول ہے۔ جس پر صہیونیوں کے ناپاک اور ناجائز قبضے کو کبھی قبول نہیں کیا جائے گا۔
انہوں نے کہا: غزہ کی مظلوم فلسطینی عوام نے قبلہ اول کے تحفظ اور مسلم فلسطینی ریاست کی بقاء کے لیے جو قربانیاں دیں وہ تاریخ مقاومت و حق خوداردیت کی تحریکوں کا سنہری باب ہیں اور یہ قربانیاں فلسطین کی بقاء میں کلیدی کردار ادا کریں گی۔
علامہ شبیر میثمی نے کہا: حکمرانوں کی جانب سے کسی بھی دو ریاستی منصوبے کی حمایت دراصل مسئلہ فلسطین اور غزہ کے مسلمانوں کے قربانیوں کو رائیگاں کرنے کے مترادف ہو گا۔
انہوں نے کہا: ایک ایسے وقت میں کہ جب غزہ کی سرزمین تاریخی نسل کشی، بربریت اور قتل و غارت گری کے باعث قحط سالی سے دوچار ہے، دنیا بھر کے آزاد انسان اور حکومتی نمائندے اسرائیلی مظالم کے خلاف سراپا احتجاج ہیں، اہل مغرب غیر مسلم ہوتے ہوئے یورپ اور امریکہ کے گلی کوچوں سے لے کر مرکزی شاہراہوں پر غزہ کی مظلوم عوام کے حق میں آواز بلند کر رہے ہیں اور امریکہ اور اسرائیل پر دباؤ ڈال رہے ہیں ۔ جنگ بندی کے مطالبات زور پکڑ رہے ہیں ایسے وقت میں ہمارے حکمرانوں کی جانب سے 21 نکاتی غیر منصفانہ امن منصوبے کی حمایت بانی پاکستان حضرت قائد اعظم محمد علی جناح (رح) کے پاکستان کے لیے طے کردہ بنیادی اصولوں اور پاکستانی عوام کے جذبات و احسات اور خواہشات کے سراسر منافی ہے۔
مرکزی سیکرٹری جنرل نے کہا: حکمران پاکستان کے بنیادی اصولوں اور عوام کے خواہشات کو مدنظر رکھتے ہوئے فلسطین کی عوام کی جاری نسل کشی کے خلاف اپنا ٹھوس اور واضح موقف اختیار کرے کہ فلسطین کا کوئی دو ریاستی حل قابل قبول نہیں اور فلسطین کی مقدس سرزمین پر قائم آزاد فلسطینی ریاست کا قیام ہی فلسطین کی مظلوم عوام کا بنیادی حق ہے۔
آپ کا تبصرہ