حوزہ نیوز ایجنسی کی رپورٹ کے مطابق، قم المقدسہ میں حرم حضرت فاطمہ معصومہ میں نمازِ عید قربان کے عظیم اجتماع سے خطاب کرتے ہوئے آیت اللہ سید محمد سعیدی نے کہا ہے کہ عید قربان انسان کو اپنی خواہشات اور دنیاوی وابستگیوں کو اللہ کی رضا کے لیے قربان کرنے کا درس دیتی ہے، اور آج امت مسلمہ کو اسی جذبۂ ایثار و قربانی کی سب سے زیادہ ضرورت ہے۔
انہوں نے حضرت ابراہیم علیہ السلام اور حضرت اسماعیل علیہ السلام کی قربانی کو یاد کرتے ہوئے کہا کہ انبیائے الٰہی، اہل بیت علیہم السلام، شہداء اور ایثار کرنے والے افراد کی سیرت مسلمانوں کے لیے مشعلِ راہ ہے۔ انہوں نے کہا کہ دینی اور انسانی اقدار کے تحفظ، مظلوموں کی حمایت اور امت کے اتحاد کے لیے مشترکہ جدوجہد وقت کی اہم ضرورت ہے۔
آیت اللہ سعیدی نے اپنے خطبے میں امت مسلمہ کو اتحاد و بیداری کی تلقین کرتے ہوئے کہا کہ دشمن طاقتیں ہمیشہ اسلامی ممالک میں تفرقہ پیدا کرنے کی کوشش کرتی رہی ہیں، لیکن مسلمان اگر وحدت اور بصیرت کا دامن تھامے رکھیں تو دشمن کے تمام منصوبے ناکام ہو جائیں گے۔
انہوں نے رہبر معظم انقلاب اسلامی کے پیغام کا حوالہ دیتے ہوئے کہا کہ حج اور عید قربان کا اصل پیغام امت مسلمہ کے درمیان اتحاد، بیداری اور ظالم قوتوں کے مقابلے میں استقامت ہے۔ انہوں نے امریکہ اور اسرائیل کی پالیسیوں کو خطے کے امن کے لیے خطرہ قرار دیتے ہوئے کہا کہ مسلمان اقوام کو مشترکہ موقف اختیار کرنا چاہیے۔
امام جمعہ قم نے مزید کہا کہ آج کا دور صرف عبادت کا نہیں بلکہ امت کے اجتماعی شعور، اخوت اور دینی ذمہ داریوں کو زندہ کرنے کا بھی دور ہے، اور عید قربان اسی روح کو تازہ کرتی ہے۔
آپ کا تبصرہ