حوزہ نیوز ایجنسی کے نمائندہ سے گفتگو کے دوران شیعہ علماء کونسل پاکستان خیبر پختونخواہ کے سابقہ آرگنائزر، صوبائی رہنما شیعہ علماء کونسل پاکستان حجت الاسلام والمسلمین سید زاہد حسنین بخاری نے "غدیر اور پاکستان میں اس کا مقام" کے موضوع پر روشنی ڈالی ہے۔ جسے ذیل میں حوزہ نیوز کے قارئین کی خدمت میں پیش کیا جا رہا ہے:
حوزہ: براہ کرم سب سے پہلے ہمارے قارئین کو اپنا مختصر تعارف کرائیں۔
حجت الاسلام والمسلمین سید زاہد حسنین بخاری:
میرا نام سید زاہد حسنین بخاری ہے۔ میں سابقہ آرگنائزر شیعہ علماء کونسل پاکستان، خیبر پختونخوا ہوں۔ اس وقت صوبائی رہنما شیعہ علماء کونسل پاکستان کے طور پر خدمات انجام دے رہا ہوں۔ تعلیمی میدان میں بطور پرنسپل اور ریجنل ڈائریکٹر/ریجنل کوآرڈینیٹر ہزارہ ڈویژن، اسوہ ایجوکیشن سمیت مختلف ذمہ داریاں نبھائی ہیں۔ اس کے علاوہ مختلف دینی، ثقافتی اور تبلیغی فرائض کی انجام دہی کا بھی شرف حاصل ہے۔
حوزہ: پاکستان میں عیدِ غدیر کی دینی اور سماجی حیثیت کیا ہے؟
حجت الاسلام والمسلمین سید زاہد حسنین بخاری:
عیدِ غدیر پاکستان میں اہلِ بیت علیہم السلام سے محبت رکھنے والے مسلمانوں کے لیے ایک اہم دینی مناسبت ہے۔ خوش آئند امر یہ ہے کہ گزشتہ برسوں میں پیغامِ غدیر اور معارفِ ولایت کے حوالے سے علمی اور ثقافتی سرگرمیوں میں اضافہ ہوا ہے تاہم اس موضوع پر مزید علمی آگاہی کی ضرورت اب بھی موجود ہے۔
حوزہ: واقعۂ غدیر کا مسلمانوں کے لیے بنیادی اعتقادی پیغام کیا ہے؟
حجت الاسلام والمسلمین سید زاہد حسنین بخاری:
واقعۂ غدیر اس حقیقت کو اجاگر کرتا ہے کہ اسلام میں ہدایت اور قیادت کا مسئلہ نہایت بنیادی حیثیت رکھتا ہے۔ ولایت درحقیقت انسان کو عدل، تقویٰ، اخلاق اور الٰہی تعلیمات کے مطابق زندگی گزارنے کی راہ دکھانے والی رہبری کا نام ہے۔
حوزہ: حدیثِ غدیر اپنی سندی حیثیت اور اسلامی منابع میں مقام کے اعتبار سے کتنی اہمیت رکھتی ہے؟
حجت الاسلام والمسلمین سید زاہد حسنین بخاری:
حدیثِ غدیر اسلامی تاریخ کی متواتر اور مستند احادیث میں شمار ہوتی ہے جسے متعدد شیعہ اور سنی علماء نے نقل کیا ہے۔ یہ واقعہ رسالتِ نبوی (ص) کے تکمیلی مرحلے اور امت کی آئندہ ہدایت کے لیے نہایت اہم سنگِ میل کی حیثیت رکھتا ہے۔
حوزہ: موجودہ حالات میں غدیر کس طرح امتِ مسلمہ کے درمیان وحدت کا ذریعہ بن سکتی ہے؟
حجت الاسلام والمسلمین سید زاہد حسنین بخاری:
غدیر کا پیغام عدل، اخوت، احترامِ متقابل اور علمی مکالمے پر مبنی ہے۔ اگر اس واقعے کو علمی اور تحقیقی انداز میں پیش کیا جائے تو یہ امتِ مسلمہ کے درمیان باہمی اعتماد اور وحدت کے فروغ میں اہم کردار ادا کر سکتا ہے۔
حوزہ: عصرِ حاضر کے چیلنجز کے مقابلے میں پیغامِ غدیر کیا عملی رہنمائی فراہم کرتا ہے؟
حجت الاسلام والمسلمین سید زاہد حسنین بخاری:
امیرالمؤمنین علیہ السلام کی سیرت عدل، شفافیت، امانت داری اور انسانی حقوق کے احترام کا بہترین نمونہ ہے۔ آج کے دور میں انتہا پسندی، بدعنوانی اور سماجی ناانصافی جیسے مسائل کا مؤثر حل انہی علوی تعلیمات میں موجود ہے۔
حوزہ: غدیر کی ترویج میں حوزاتِ علمیہ، جامعات اور میڈیا کیا کردار ادا کر سکتے ہیں؟
حجت الاسلام والمسلمین سید زاہد حسنین بخاری:
علمی مراکز اور میڈیا کو چاہیے کہ وہ معارفِ اہلِ بیت علیہم السلام اور ثقافتِ غدیر کو تحقیق، تعلیم اور جدید ذرائع ابلاغ کے ذریعہ نوجوان نسل تک پہنچائیں۔ اس مقصد کے لیے علمی کانفرنسز کے انعقاد، تحقیقی منصوبوں اور میڈیا پروگراموں کو مزید فروغ دینا ضروری ہے۔
حوزہ: عیدِ سعیدِ غدیر کے موقع پر آپ کا پیغام کیا ہے؟
حجت الاسلام والمسلمین سید زاہد حسنین بخاری:
عیدِ غدیر ہمیں عدل، وحدت، اخلاق اور الٰہی قیادت کے اصولوں کی یاد دلاتی ہے۔ میری دعا ہے کہ پاکستان اور عالمِ اسلام اس عظیم پیغام سے رہنمائی حاصل کرتے ہوئے اتحاد، بصیرت اور باہمی احترام کی راہ پر گامزن رہیں۔
آپ کا تبصرہ