رہبرِ شہید کی ایسی تشییع ہوگی کہ تاریخِ بشر میں اس کی مثال نہیں ملے گی: مولانا سید رضا حیدر زیدی

حوزہ نیوز ایجنسی کی رپورٹ کے مطابق، شاہی آصفی مسجد لکھنؤ میں جمعہ 3 جولائی 2026 کو نمازِ جمعہ حجۃ الاسلام والمسلمین مولانا سید رضا حیدر زیدی، پرنسپل حوزۂ علمیہ حضرت غفران مآبؒ، کی اقتدا میں ادا کی گئی۔ خطبۂ جمعہ میں انہوں نے ایامِ عزائے حسینیؑ کی مناسبت سے فلسفۂ عزاداری، اعمالِ عاشورا، پیغامِ قرآن، جلوس ہائے عزا کے تحفظ اور امتِ مسلمہ کو درپیش موجودہ چیلنجز پر تفصیلی روشنی ڈالی۔

مولانا سید رضا حیدر زیدی نے کہا کہ ایام عزا ہیں، اگرچہ عشرۂ اولِ محرم اختتام پذیر ہو چکا ہے، لیکن غمِ حسینی کی کیفیت اور عزاداری کی روح ہمیشہ زندہ رہنی چاہیے، کیونکہ عزاداریِ سیدالشہداءؑ دینِ محمدیؐ کی بقا، شعائرِ الٰہی کی حفاظت اور حق و باطل کے درمیان امتیاز کا مؤثر ذریعہ ہے۔ انہوں نے کہا کہ عزاداری صرف گریہ و ماتم کا نام نہیں بلکہ یہ انسان کو دینی، اخلاقی اور سماجی ذمہ داریوں کا شعور بھی عطا کرتی ہے۔

انہوں نے اعمالِ عاشورا میں وارد چار رکعت نماز کا ذکر کرتے ہوئے کہا کہ اس میں سورۂ کافرون، سورۂ توحید، سورۂ احزاب اور سورۂ منافقون کی تلاوت درحقیقت ایک فکری و عملی منشور ہے، جو مؤمن کو توحید، استقامت، حق گوئی، دشمن شناسی اور نفاق سے بیزاری کا درس دیتا ہے۔

غزوۂ احزاب (جنگِ خندق) کا تذکرہ کرتے ہوئے مولانا سید رضا حیدر زیدی نے کہا کہ جب کفر اپنی پوری قوت کے ساتھ اسلام کے خلاف متحد ہو گیا تھا، اس وقت حضرت امیرالمؤمنین علی علیہ السلام نے عمرو بن عبدود کو واصلِ جہنم کرکے اسلام کو فیصلہ کن کامیابی سے ہمکنار کیا۔ اسی موقع پر رسولِ اکرم صلی اللہ علیہ وآلہ وسلم نے فرمایا: "علیؑ کی ایک ضربت عبادتِ ثقلین سے افضل ہے۔"

انہوں نے سورۂ احزاب کی آیت ﴿الَّذِينَ يُبَلِّغُونَ رِسَالَاتِ اللَّهِ وَيَخْشَوْنَهُ وَلَا يَخْشَوْنَ أَحَدًا إِلَّا اللَّهَ﴾ کی تشریح کرتے ہوئے کہا کہ اعمالِ عاشورا میں اس سورت کی تلاوت اس حقیقت کی یاد دہانی ہے کہ جو اللہ سے ڈرتا ہے وہ دنیا کی کسی طاقت، جبر یا ظلم سے مرعوب نہیں ہوتا۔

اسی طرح سورۂ احزاب کی آیت ﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ﴾ کی وضاحت کرتے ہوئے انہوں نے کہا کہ یہ آیت وفاداری، ایثار اور عہد کی پاسداری کا ابدی پیغام ہے۔ روایات میں مذکور ہے کہ امام حسین علیہ السلام نے میدانِ کربلا میں متعدد اصحاب کی شہادت کے موقع پر اس آیت کی تلاوت فرمائی۔

خطبہ کے دوران مولانا سید رضا حیدر زیدی نے حالیہ جلوسِ عزا میں مبینہ طور پر زہریلی دوا تقسیم کئے جانے کے واقعہ کا حوالہ دیتے ہوئے عزاداروں کو انتہائی بیدار اور محتاط رہنے کی تلقین کی۔ انہوں نے کہا کہ ایسے واقعات اس بات کا تقاضا کرتے ہیں کہ جلوسوں اور مجالس عزا کی حفاظت کے لئے منظم اور مؤثر انتظامات کئے جائیں۔

شہیدان کربلا حضرت سعید اور حضرت زہیر علیہما السلام کی وفاداری کا ذکر کرتے ہوئے انہوں نے انجمنوں سے اپیل کی کہ وہ کچھ ذمہ دار نوجوانوں کو معین کریں جو جلوسوں اور مجالس عزا پر مسلسل نظر رکھیں تاکہ کسی بھی تخریبی یا شرپسندانہ کوشش کو بروقت ناکام بنایا جا سکے۔ انہوں نے کہا کہ عزاداری کی حفاظت کرنے والے جوان بھی اجر و ثواب کے اعتبار سے کسی طرح عزاداری انجام دینے والوں سے کم فضیلت کے حامل نہیں۔

مولانا سید رضا حیدر زیدی نے امام علی رضا علیہ السلام سے منقول اس روایت کو بھی بیان کیا کہ امام موسیٰ کاظم علیہ السلام ماہِ محرم کے آغاز سے عاشورا تک مسلسل غم و اندوہ کی کیفیت میں رہتے تھے۔ انہوں نے کہا کہ معصومین علیہم السلام کی سیرت سے معلوم ہوتا ہے کہ ایامِ عزا میں انسان کا ظاہر و باطن غمِ حسین علیہ السلام سے آشنا ہونا چاہیے، جبکہ افسوس کے ساتھ کہنا پڑتا ہے کہ بعض مقامات پر اس تقدس کے برخلاف ہنسی مذاق اور غیر ضروری شور و غل بھی دیکھنے میں آتا ہے۔

مولانا سید رضا حیدر زیدی نے رہبرِ معظم آیۃ اللہ العظمیٰ سید علی حسینی خامنہ ایؒ کا ذکر کرتے ہوئے فرمایا کہ رہبرِ معظم کی مظلومیت مکتبِ اہلِ بیتؑ کو تقویت دے رہی ہے، اسے مزید طاقت عطا کر رہی ہے۔

مولانا سید رضا حیدر زیدی نے مزید فرمایا کہ یہ مکتبِ اہلِ بیت علیہم السلام کے رہنما کی تشییع ہے۔ تہران، قم مقدسہ، کربلائے معلیٰ اور نجفِ اشرف میں تشییع ہوگی اور آخر میں مشہدِ مقدس میں تدفین ہوگی۔ انشاء اللہ ایسی تشییع ہوگی کہ تاریخِ بشر میں اس کی مثال نہیں ملے گی۔

انہوں نے کہا کہ امریکی صدر ڈونلڈ ٹرمپ یہ سمجھ رہا تھا کہ رہبر کو شہید کر کے انہیں ختم کر دے گا، لیکن جیسے جیسے دن گزریں گے، خود امریکی عوام کو سمجھ میں آئے گا کہ ان کے صدر نے کتنی بڑی غلطی کی ہے اور اس کا خمیازہ انہیں بھگتنا پڑے گا۔

مولانا سید رضا حیدر زیدی نے زور دے کر فرمایا کہ ہم پر بڑی مصیبت آئی ہے۔ جو لوگ ہمارے غم میں شریک نہیں ہوئے بلکہ خوشیاں مناتے رہے، جیسے یزیدیوں نے امام حسین علیہ السلام کی شہادت کے بعد خوشیاں منائی تھیں، ایسے لوگوں سے قدرت خود انتقام لے گی، اور ایسا انتقام لے گی کہ وہ اسی طرح ذلیل و رسوا ہوں گے جیسے یزید ذلیل و رسوا ہوا۔

آخر میں مولانا سید رضا حیدر زیدی نے فرمایا کہ ان شاء اللہ ایک تاریخی تشییعِ جنازہ ہوگی، جس سے دنیا پہچانے گی کہ ہم کون ہیں۔ دنیا ہمیں پہچان نہ سکی کہ ہم کون ہیں۔ ہم کربلا والے ہیں؛ جتنا ہمارا خون بہے گا، اتنی ہی ہمیں کامیابی ملے گی، اور اس طوفان میں ہم نہیں بلکہ ظالم ڈوبیں گے۔