حوزہ نیوز ایجنسی کی رپورٹ کے مطابق، ایران کے شہر تویسرکان کی تبلیغی کونسل کا اجلاس آج تویسرکان کے امام جمعہ حجت الاسلام والمسلمین سید روح اللہ زمانی موسوی کی زیر صدارت اور کونسل کے اراکین کی موجودگی میں امام جمعہ کے دفتر میں منعقد ہوا۔
اس پروگرام میں تبلیغی و ثقافتی سرگرمیوں کو مضبوط بنانے، معارف اسلامی اور ثقافت اہل بیت علیہم السلام کے فروغ، مساجد کے مقام کو مستحکم کرنے اور معاشرے میں علماء و مبلغین کی موجودگی بڑھانے کے طریقوں کا جائزہ لیا گیا۔
حجت الاسلام والمسلمین زمانی موسوی نے جهاد تبیین کی اہمیت اور معاشرے کی فکری رہنمائی میں علماء و مبلغین کے کردار پر زور دیتے ہوئے کہا: آج دین کی تبلیغ ایمان، دینی شناخت اور انقلاب اسلامی کی اقدار کے دفاع کے اہم ترین میدانوں میں سے ایک ہے اور مبلغین کو چاہیے کہ وہ عوام کے درمیان مؤثر اور مسلسل موجودگی کے ذریعے معاشرے کی اعتقادی اور ثقافتی ضروریات کا جواب دیں۔
انہوں نے نوجوان نسل پر خصوصی توجہ دینے کی ضرورت کی طرف اشارہ کرتے ہوئے کہا: سوالات اور شبہات کا دانشمندانہ جواب، بصیرت میں اضافہ اور امید پیدا کرنا تبلیغی سرگرمیوں کی ترجیحات میں شامل ہونا چاہیے۔ علماء اور مبلغین کو منطق، اخلاق، ایمان اور روشنگری سے استفادہ کرتے ہوئے نوجوانوں کے ساتھ مؤثر رابطہ قائم کرنا چاہیے۔
تویسرکان کے امام جمعہ نے ثقافتی اور سماجی سرگرمیوں میں مساجد کے کردار پر زور دیتے ہوئے کہا: مسجد محلے کی دینی اور ثقافتی سرگرمیوں کا محور ہونی چاہیے اور علماء و مبلغین کی معاشرے میں موجودگی عوام کے ساتھ قریبی رابطے اور ان کے مسائل و ضروریات کو بہتر طور پر سمجھنے کا موقع فراہم کرسکتی ہے۔
انہوں نے مزید کہا: ایسے حالات میں جب معاشرہ مختلف ثقافتی اور اعتقادی یلغاروں کا سامنا کر رہا ہے، تبلیغی محاذ کو مضبوط بنانا اور ثقافتی سرگرمیوں کے لیے منظم منصوبہ بندی کرنا ایک اہم ضرورت ہے۔ اس سلسلے میں شہر کے تمام علماء، مبلغین، مساجد اور ثقافتی اداروں کی صلاحیتوں سے بھرپور استفادہ کیا جانا چاہیے۔
آپ کا تبصرہ