حوزہ نیوز ایجنسی کی رپورٹ کے مطابق، سٹی آف نالج پبلک اسکول جیکب آباد بلوچستان پاکستان میں تقریب تقسیم ایوارڈ منعقد ہوئی اس موقع پر بہترین کارکردگی کے حامل طلباء و طالبات میں ایوارڈز تقسیم کئے گئے۔
تقسیم ایوارڈ تقریب سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ تعلیم کسی بھی قوم کی ترقی عزت اور سربلندی کا سبب ہے علم نور و روشنی ہے، جبکہ جہالت گمراہی تاریکی اور پسماندگی کا سبب ہے۔ یہی سبب ہے کہ قرآن کریم نے حصول علم کی بہت زیادہ تاکید کی ہے۔ قرآن کریم کی پہلی وحی کا آغاز اقرء باسم ربک یعنی پڑھ اپنے رب کے نام سے، کے حکم سے ہوا۔
انہوں نے کہا کہ حکومتی عدم توجہی کے سبب سرکاری تعلیمی اداروں کی ابتر صورتحال ہے جہاں قوم کے بچے معیاری تعلیم سے محروم ہیں ملک میں امیر و غریب کے لئے الگ تعلیمی نظام ظلم ہے جس کے باعث غریب عوام کے لئے اعلی حکومتی عہدوں تک رسائی ناممکن بنا دی گئی ہے۔
علامہ مقصود علی نے مزید کہا کہ وطن عزیز پاکستان میں شرح خواندگی افسوس ناک حد تک کم ہے، جبکہ تعلیمی ادارے نقل کی لعنت سے نجات حاصل نہیں کر سکے ہیں۔
انہوں نے کہا کہ طلباء و طالبات محنت اور لگن سے تعلیم حاصل کرتے ہوئے اپنی قوم و ملک کا نام روشن کریں۔ ملک میں اس وقت تعلیمی انقلاب کی ضرورت ہے۔
