حوزہ نیوز ایجنسی کی رپورٹ کے مطابق، انٹرنیشنل مسلم یونٹی کونسل کا ایک اعلٰی سطحی وفد، حجت الاسلام والمسلمین مولانا مسرور عباس انصاری کے گھر ملاقات کی غرض سے تشریف لایا، ملاقات کے دوران وفد نے مولانا مسرور عباس انصاری اور ان کے والد مرحوم حجت الاسلام والمسلمین مولانا محمد عباس انصاری کی وحدت اسلامی کے حوالے سے نمایاں کارکردگی کو سراہتے ہوئے کہا کہ کشمیر میں جموں و کشمیر اتحاد المسلمین کی کاوشوں کو سنہرے حروف سے لکھا جائے گا۔
اس وفد نے مولانا مسرور عباس انصاری سے اتحاد اسلامی کی اہمیت و افادیت پر تفصیلی تبادلہ خیال کرتے ہوۓ انہیں انٹرنیشنل مسلم یونٹی کونسل کے اغراض و مقاصد بھی آگاہ کیا اور آپ سے اس حوالے سے ہمکاری کی اپیل کی۔
وفد کی سربراہی مفتی مدثر احمد قادری اشرفی اور مولانا مشتاق محی الدین حقنواز کررہے تھے۔ کونسل نے گزشتہ برس سے مختلف مسالک سے وابستہ سرکردہ شخصیات سے "رحماء بینھم مشن" کے تحت ہفت وار نشستوں کا اہتمام جاری رکھا ہے جن کا بنیادی مقصد تمام مسالک کے درمیان اتحاد اسلامی کو پروان چڑھانا ہے۔
ملاقات کے دوران مولانا مسرور عباس انصاری نے اتحاد اسلامی کی اہمیت و ضرورت پر تفصیلی گفتگو کی۔ انہوں نے کہا کہ ہم ہمیشہ کی طرح آج کے دور میں بھی اتحاد المسلمین اور وحدت اسلامی کی تمام کاوشوں کا تعاون پیش کرتے رہینگے۔
انہوں نے کہا کہ آج کے پر فتن دور میں انتشاری عناصر سوشل میڈیا کا استعمال کرکے فتنہ برپا کر نے میں جان توڑ کوشش میں مصروف عمل ہیں۔
مولانا نے کہا کہ اتحاد اسلامی کے مشن میں ہم ایک ہی ہیں الگ الگ نہیں ہیں۔ ہمیں موجودہ تقاضوں کو پیش نظر رکھ کر اتحاد اسلامی کا مظاہرہ کرنا چاہیئے۔
مولانا مسرور عباس انصاری نے انٹرنیشنل مسلم یونٹی کونسل کو تعاون دینے کی یقین دہانی کی ہے۔ ادھر آئی ایم یو سی کا مذکورہ وفد نے امام بارگاہ آیت اللہ یوسف بمنہ جاکر حجۃ الاسلام والمسلمین آغا سید محمد فضل اللہ الموسویؒ کی پانچویں برسی کے حوالے سے منعقدہ مجلس ترحیم میں شرکت کی ہے۔
وفد نے حجۃ الاسلام والمسلمین آغا سید محمد فضل اللہ الموسویؒ کی دینی خدمات کو سراہتے ہوۓ انکے فرزند ارجمند حجۃ الاسلام والمسلمین آغا سید محمد ہادی موسوی صاحب حفظ اللہ کی خدمت میں تعزیت و تسلیت پیش کی ہے۔
