حوزہ نیوز ایجنسی کی رپورٹ کے مطابق، ہندوستان سے حجاج کرام کا پہلا قافلہ سعودی عرب کے لیے روانہ ہو گیا ہے، اعداد و شمار کے مطابق، لکھنئو سے 288، حیدرآباد سے 262 اور ممبئی سے 433 عازمین سعودی عرب روانہ ہو گئے ہیں۔
اس موقع پر مرکزی وزیر اقلیتی امور کرن رجیجو نے تمام عازمین کو دل کی گہرائیوں سے نیک خواہشات کا اظہار کیا۔
جوائنٹ سیکریٹری وزارتِ اقلیتی امور، سی، پی بخشی اور حج کمیٹی آف انڈیا کے چیف ایگزیکٹو آفیسر- آئی، اے، ایس شاہ نواس - سی نے دعائیہ کلمات سے رخصت کیا۔
ممبئی- حج 2025 کے لیے ہندوستان کے سب سے بڑے امبارکیشن پوائنٹ ممبئی سے 433 خوش نصیب عازمینِ حج کا پہلا قافلہ چھتر پتی شیواجی مہاراج بین الاقوامی ائیرپورٹ سے سعودی ایئر لائنز کی پرواز ایس وی 3089 سے آج شام 5 بجکر 5 منٹ پر مدینہ منورہ کے لیے روانہ ہوا ہے۔
اس موقع پر منعقدہ ایک پُر وقار دعائیہ تقریب میں عازمینِ حج کو شایانِ شان انداز میں رخصت کرتے ہوئے وزارتِ اقلیتی امور، حکومتِ ہند میں جوائنٹ سیکرٹری سی، پی بخشی، حج کمیٹی آف انڈیا کے چیف ایگزیکٹو آفیسر- آئی، اے، ایس شاہ نواس - سی نے کہا کہ آپ سب انتہائی خوش نصیب ہیں، چونکہ ربِ کریم نے آپ کو اپنا مہمان چُنا ہے، اسی کے ساتھ آپ سب مملکتِ سعودی عرب میں ہندوستان کے نمائندے بھی ہیں۔ آپ اپنے عمل سے ملک کا نام روشن اور بلند کریں۔ ان اعلیٰ آفسران نے بتایا کہ حکومت ہند خصوصاً امورِ حج سے وابستہ وزارتِ اقلیتی امور اور حج کمیٹی آف انڈیا نے حج 2025 کو سہولیات سے پُر بنانے کے لیے ہر سطح پر ممکنہ بھر پور کوشش کی ہے۔ لیکن ہم ہمیشہ سے سُنتے اور پڑھتے آرہے ہیں کہ سفر حج مشکلات کا مجموعہ ہے تمام تر کوششوں کے باوجود بھی کہیں نہ کہیں کمی رہ ہی جاتی ہے - آفسران نے عازمین سے اپیل کی کہ دقتوں اور پریشانیوں کے حل کے لیے وزارتِ اقلیتی امور حکومت ہند کی نگرانی میں تیار کردہ حج سویدھا ایپ کا باقاعدگی سے استعمال کریں۔
"حج سویدھا ایپ" عازمین کے لیے ایک ڈیجیٹل رہنما کی حیثیت رکھتا ہے اس میں تمام تٙر مشکلات کا آسان حل موجود ہے- آئی- ا ے-ایس شاہ نواس ۔سی، چیف ایکزیکیٹیو آفیسر حج کمیٹی آف انڈیا نے مزید کہا کہ ہم سب جانتے ہیں کہ سفرِ حج اور ادائیگی حج ایک مشکل عمل ہے۔ اس میں کچھ جسمانی اور غذائی تکالیف برداشت کرنا ہی پڑتیں ہیں۔ ایسے مواقع پر جزباتی نہ ہوں بلکہ صبر و تحمل سے کام لیں۔ حج غیر ملکی سٙر زمین پر ہوتا ہے اور آپ یہاں اپنے ملک کے نمائندے ہوتے ہیں۔ یہاں اپنے عمل و کردار، اخلاق و برتاو سے ملک کے وقار کو بلند کیجئے چھوٹی چھوٹی باتوں کو نظر انداز کریں ، افواہوں اور جھوٹے پروپیگنڈے کا شکار نہ ہوں ۔ صبر و تحمل کا مظاہرہ کریں۔ سی، ای، او شاہ نواز سی نے بتایا کہ حج 2025 میں بھی ہندوستان کا سب بڑا امبارکیشن پوئنٹ ممبئی ہے ۔ یہاں سے سعودی ائیر لائنز کی 73 فلائٹس کے زریعے مختلف ریاستوں کے تقریباً 30000 ہزار ہندوستانی حجاج فریضہ حج کی ادائیگی کے لیے مدینہ/ جدہ روانہ ہوں گے۔
عازمین کی سہولت کے لیے حج ہاؤس میں میڈیکل ٹیم، سعودی کرنسی کے لیے بینک کاونٹر اور دیگر لازمی سہولیات، اضافی اسٹاف، حج رضاکار تنظیمیں ہمہ وقت موجود ہیں۔
حج کمیٹی آف انڈیا کی اپیل پر ائیر پورٹ اتھارٹی نے ائیر پورٹ پر حاجیوں کے بیٹھنے، کھانے، انتظاری لمحات گزارنے اور عبادت کرنے کے لیے معقول انتظامات کیے ہیں، جس کے لیے حج کمیٹی آف انڈیا کے سی، ای، او۔ نے ایئرپورٹ اتھارٹی کا خصوصی شکریہ ادا کیا ہے۔
عازمینِ حج کے اعزاز میں منعقدہ دعائیہ پروگرام کے موقع پر ایئرپورٹ پر حج کمیٹی آف انڈیا کے ڈپٹی چیف ایگزیکٹیو آفیسرز ڈاکٹر صداقت علی، ڈاکٹر محمد نیاز احمد، پی ۔ایس چیف ایگزیکٹو آفیسر صلاح ایدین، سپرنڈینٹ شیخ محمد غوث، سپرنڈینٹ شیخ حیدر پاشا، ساجد پلیکر اور محمد اسمعیل خان کے ساتھ امور حج سے وابستہ متعلقہ تمام ایجنسیز کے اعلیٰ آفسران موجود تھے۔
آپ کا تبصرہ