حوزہ نیوز ایجنسی کی رپورٹ کے مطابق، سرینگر/ انجمن شرعی شیعیان جموں و کشمیر کے صدر حجۃ الاسلام و المسلمین آغا سید حسن الموسوی الصفوی نے اپنے ایک شدید ردعمل میں صہیونی حکومت کے غزہ شہر پر مکمل قبضے اور وہاں کے بے گناہ شہریوں کو جبری طور پر بے دخل کرنے کے منصوبے کو فلسطینی عوام کی کھلی نسل کشی اور انسانی حقوق کی سنگین پامالی قرار دیا ہے۔
آغا سید حسن نے کہا کہ یہ اقدام دراصل اسی غاصب صہیونی وزیرِاعظم نتن یاہو کی پالیسی کا تسلسل ہے، جو پہلے ہی بین الاقوامی فوجداری عدالت میں جنگی جرائم اور انسانیت کے خلاف جرائم کے الزامات کا سامنا کر رہے ہیں۔ یہ ایک ناقابلِ تردید ثبوت ہے کہ صہیونی حکومت نہ صرف فلسطینی عوام کو ان کی سرزمین سے محروم کرنے کی منصوبہ بندی کر رہی ہے بلکہ انہیں منظم اور منصوبہ بند طریقے سے صفحہ ہستی سے مٹانے کی کوشش بھی کر رہی ہے۔
انہوں نے کہا کہ غزہ کے نہتے عوام گزشتہ کئی ماہ سے بے مثال بربریت، محاصرے، بھوک اور بمباری کا سامنا کر رہے ہیں، اور اب ان کی جبری بے دخلی کا اعلان اس ظلم کو ایک نئے اور خطرناک موڑ پر لے گیا ہے۔ یہ عمل بین الاقوامی قوانین، اقوام متحدہ کے چارٹر اور انسانی ضمیر کی کھلی توہین ہے۔
آغا سید حسن الموسوی الصفوی نے عالمی برادری، بالخصوص اقوام متحدہ، اسلامی تعاون تنظیم (OIC)، یورپی یونین، اور انسانی حقوق کے عالمی اداروں سے پرزور مطالبہ کیا کہ وہ فوری اور مؤثر اقدامات کریں تاکہ فلسطینی عوام کے خلاف جاری اس نسل کشی اور منظم قتل عام کو روکا جا سکے.
انہوں نے اسلامی ممالک کی حکومتوں کو مخاطب کرتے ہوئے کہا کہ اب محض مذمتی بیانات کافی نہیں، عملی اقدامات کا وقت آ چکا ہے۔ اقتصادی بائیکاٹ، سفارتی دباؤ، اور عالمی عدالتوں میں جنگی جرائم کے مقدمات چلانے جیسے ٹھوس اقدامات کیے بغیر اس بربریت کو روکنا ممکن نہیں۔
آخر میں آغا سید حسن نے دنیا بھر کے باضمیر انسانوں سے اپیل کی کہ وہ فلسطینی عوام کے ساتھ اظہارِ یکجہتی کریں، ان کی حمایت میں آواز بلند کریں، اور اس انسانی المیے کو رکوانے کے لیے ہر ممکن جدوجہد کریں۔
آپ کا تبصرہ