جامعۃ الزہرا (س) میں طالبات کی تعلیم و تربیت کے لیے نیا منصوبہ

حوزہ نیوز ایجنسی سے گفتگو کرتے ہوئے محترمہ سیدہ زہرہ برقعی نے بتایا کہ جامعۃ الزہرا سلام اللہ علیہا میں طالبات کی تربیت کے لیے ایک نیا جامع منصوبہ تیار کیا گیا ہے، جس پر نئے تعلیمی سال سے عمل شروع ہوگا۔ اس منصوبے میں خاص طور پر پہلے سے تیسرے ٹرم کی طالبات پر توجہ دی جائے گی۔

انہوں نے کہا کہ اس پروگرام کا مقصد ایسی طالبات تیار کرنا ہے جو صرف کتابی علم تک محدود نہ رہیں، بلکہ حاصل کیے ہوئے علم کو اپنی زندگی میں استعمال بھی کرسکیں۔ اس کے لیے طالبات میں دینی، اخلاقی، علمی، خاندانی، سماجی، تحقیقی، ابلاغی، انتظامی اور دیگر ضروری صلاحیتیں پیدا کرنے پر توجہ دی جائے گی۔

سیدہ زہرہ برقعی کے مطابق اس منصوبے کی تیاری میں طالبات کی ضروریات کے ساتھ اس بات کو بھی سامنے رکھا گیا ہے کہ خواتین بیٹی، بیوی اور ماں کی حیثیت سے مختلف ذمہ داریاں ادا کرتی ہیں۔ جامعۃ الزہرا چاہتا ہے کہ طالبات دین، خاندان اور معاشرے میں اپنی ذمہ داریوں کو اچھی طرح سمجھیں اور انہیں بہتر انداز میں ادا کرسکیں۔

انہوں نے بتایا کہ اس منصوبے کی تیاری کے لیے جون 2026 سے کام شروع کیا گیا اور اب تک 14 اجلاس منعقد ہوچکے ہیں۔ جامعۃ الزہرا کے مختلف تعلیمی، تربیتی، تحقیقی، مشاورتی اور انتظامی شعبوں نے مل کر اس پروگرام کو تیار کیا ہے۔

مدیر جامعۃ الزہرا نے کہا کہ اس پروگرام میں 12 اہم شعبوں کو شامل کیا گیا ہے۔ ان میں عبادت و روحانیت، اخلاق و تربیت، ذاتی زندگی، خاندان، تعلیم، سماجی امور، تبلیغ، تحقیق، ذرائع ابلاغ، مشاورت، انتظام اور فن و ادب شامل ہیں۔

انہوں نے وضاحت کی کہ طالبات کو ان مہارتوں کے لیے الگ سے صرف کلاسیں نہیں دی جائیں گی، بلکہ موجودہ اسباق کے دوران بھی ان کی عملی تربیت کی جائے گی۔ مثال کے طور پر منطق کے استاد طالبات میں بہتر سوچنے، مسئلے کو سمجھنے اور درست نتیجہ نکالنے کی صلاحیت پیدا کریں گے۔ اسی طرح دوسرے اساتذہ بھی اپنے پڑھانے کے انداز سے وقت کی پابندی، تحقیق اور دیگر ضروری صلاحیتوں کی تربیت کریں گے۔

نئے تعلیمی سال میں نئی طالبات کے لیے ’’راہ روشن‘‘، افتتاحی پروگرام اور ’’مسیر تحصیل‘‘ سمیت مختلف پروگرام ہوں گے۔ اخلاق و بصیرت کی نشستوں، نئے تعلیمی موضوعات اور عملی تربیت کو بھی اس کا حصہ بنایا گیا ہے۔

سیدہ زہرہ برقعی نے حضرت فاطمہ زہرا سلام اللہ علیہا کو مسلمان خواتین کے لیے بہترین نمونہ قرار دیتے ہوئے کہا کہ ایک خاتون بیک وقت ایک اچھی بیٹی، بیوی اور ماں ہونے کے ساتھ معاشرے میں بھی اہم کردار ادا کرسکتی ہے۔ انہوں نے کہا کہ ایسی خواتین کی تربیت بھی جامعۃ الزہرا کی اہم ذمہ داری ہے جو اپنے خاندان اور نئی نسل کی اچھی تربیت کرسکیں۔

انہوں نے امید ظاہر کی کہ آٹھ ٹرم کی تعلیم مکمل کرنے کے بعد طالبات صرف علم رکھنے والی نہیں بلکہ اس علم کو عملی زندگی میں استعمال کرنے والی ہوں گی اور اپنے خاندان، معاشرے اور ملک کی بہتری میں مؤثر کردار ادا کریں گی۔