حوزہ نیوز ایجنسی کی رپورٹ کے مطابق، انجمنِ شرعی شیعیان کے زیر اہتمام تلرزو بانڈی پورہ میں مجلسِ حسینی کا انعقاد ہوا، جس میں ہزاروں کی تعداد میں عزاداروں نے شرکت کی۔ حسب روایت قدیم جلوس علم بر آمد کیا گیا، جو آستانہ عالیہ میر دانیالؒ میں اختتام پذیر ہوا۔

مجلسِ حسینی سے خطاب کرتے ہوئے صدر انجمنِ شرعی شیعیان حجت الاسلام والمسلمین آغا سید حسن الموسوی الصفوی نے اسیرانِ کربلا کے کردار و عمل پر تفصیلی روشنی ڈالی اور شام و کوفہ میں پیش آئے جگر سوز حالات و واقعات بیان کئے۔

آغا صاحب نے وادی کی حالیہ صورتحال کو مد نظر رکھتے ہوئے کہا کہ ایسا محسوس ہوتا ہے کشمیر میں عزادار اور عزاداری کو بدنام کرنے کے لئے بہت ایجنسیاں کام کررہی ہیں جن کا قلع قمہ کرنے تک جوانوں کو محفوظ رہنے کی ضرورت ہیں آج جہاں مجالسِ حسینی کو بند کرنے کے لئے مختلف حربے آزمائے جاتے ہیں وہی جلوس عزاء میں نوجوان بے راہ روی کے شکار ہوتے ہوئے مختلف نعروں اور پرچموں کا استعمال کرتے ہیں جو کہ عزاداری اور جلوس حسینی کا چہرہ مسخ کی ناقابلِ برداشت سازش ہے۔