حوزہ نیوز ایجنسی کی رپورٹ کے مطابق، ایم ڈبلیو ایم پاکستان کے مرکزی رہنماء علامہ مقصود علی ڈومکی نے جیکب آباد میں جشن کی محفل سے خطاب کرتے ہوئے کہا ہے کہ نواسہ رسول حضرت امام حسین عالی مقام علیہ السلام کی حیاتِ طیبہ عالم انسانیت کے لئے مشعلِ راہ ہے۔
انہوں نے مزید کہا امام حسین علیہ السّلام کشتی نجات اور چراغ ہدایت ہیں، اسی لئے عصرِ حاضر کی انسانیت کو ان کے نقش قدم پر چلتے ہوئے عصرِ حاضر کے یزیدیوں کو عبرت ناک شکست دینی چاہیے۔
انہوں نے کہا کہ میلاد امام حسین علیہ السلام کے موقع پر زمین و آسمان والے سبھی خوش ہیں۔ روایت ہے کہ تین شعبان المعظم کو امام حسین علیہ السلام کی ولادت باسعادت کے موقع پر جنت کو سجایا گیا۔
اس موقع پر تقریب جشن سے خطاب کرتے ہوئے انجمنِ سپاہ علی اکبر علیہ السلام کے چیئرمین سید احسان علی شاہ بخاری نے کہا کہ امام حسین علیہ السلام پوری انسانیت کے رہبر اور رہنماء ہیں۔ اسی لئے ہر مذہب، رنگ اور نسل کے انسان آپ سے عقیدت رکھتے ہیں اور آپ کو اپنا رہبر اور رہنماء مانتے ہیں۔
تقریب میں معروف قصیدہ خوان عرفان علی درویش، غلام شبیر پنجتنی، وقار حسین، عشق علی لاہوتی و دیگر نے بارگاہِ اہل بیت (ع) میں نذرانہ عقیدت پیش کیا۔
پروگرام کے بعد میلاد امام حسین علیہ السلام اور حضرت عباس علمدار علیہ السلام کی مناسبت سے کیک بھی کاٹا گیا۔
آپ کا تبصرہ