حوزہ نیوز ایجنسی کی رپورٹ کے مطابق، جموں کشمیر انجمنِ شرعی شیعیانِ کے اہتمام سے وادی کے طول و ارض میں جمعۃالوداع کے اجتماعات منعقد ہوئے اور درجنوں مقامات پر حکومتی محاصروں کے باوجود یوم قدس کی مناسبت سے جلوس برآمد کئے گئے۔
تصاویر دیکھیں: انجمنِ شرعی شیعیانِ جموں وکشمیر کے تحت عالمی یوم القدس پر عظیم الشان ریلی
اس موقع پر فلسطین کی آزادی کے لئے خصوصی دعائیں مانگی گئیں اور ائمہ جمعہ نے جمعۃالوداع کی فضیلت و عظمت،یوم قدس کی اہمیت اور فلسطین کی موجودہ صورتحال سے عوام الناس کو آگاہ کیا۔
جمعۃ الوداع کا سب سے بڑا اجتماع مرکزی امام باڑہ بڈگام میں منعقد ہوا، جہاں ہزاروں فرزندانِ توحید نے انجمن شرعی شیعیان کے صدر حجۃ الاسلام والمسلمین آغا سید حسن الموسوی الصفوی کی اقتداء میں نماز جمعہ ادا کی۔
آغا صاحب نے جمعۃ الوداع اور یوم قدس کی وضاحت کرتے ہوئے کہا کہ ماہ مبارک کے آخری عشرے بالخصوص جمعۃ الوداع کے دن اللہ تعالیٰ اپنے بندوں کی دعاؤں کو لازمی طور پر مستجاب فرماتا ہے۔ آج کے دن جہاں ایک طرف مسلمان خداوند متعال سے اپنی دنیا و آخرت کی سرخروئی کیلئے دست بدعا ہیں وہیں دوسری طرف اپنے مظلوم و محکوم برادران ملت سے اظہار یکجہتی مسلمانوں کا دینی فریضہ اور ظلم و تسلط سے ان کی نجات کیلئے دعا کرنا ایک ایمانی تقاضا ہے۔
نماز جمعہ کی ادائیگی کے بعد تنظیم کے اہتمام سے آغا صاحب کی قیادت میں مرکزی امام باڑہ بڈگام سے یوم قدس کا جلوس نکالا گیا، جس میں ہزاروں فرزندانِ توحید نے شرکت کی۔
مین چوک بڈگام میں لوگوں کے جمع غفیر سے خطاب کرتے ہوئے آغا صاحب نے کہا کہ مظلومین عالم کے تئیں عالمی برادری کی عدم توجہی امن عالم اور انسانیت کیلئے ایک سنگین خطرہ ہے۔
انہوں نے کہا کہ ایک خودمختار فلسطینی مملکت کے قیام کے سوا پُرامن مشرقی وسطیٰ کا خواب کبھی بھی شرمندہ تعبیر نہیں ہوگا۔ اسرائیل اپنے مکروہ عزائم کی تکمیل کیلئے فلسطینی عوام کو اپنی سرزمین سے بے دخل کرنے کی پالیسی پر گامزن ہے اور مسلمانوں کے قبلہ اول کا وجود مٹانے کا متمنی ہے، لیکن فلسطینی عوام کی مزاحمت اسرائیلی عزائم کی راہ میں سب سے بڑی رکاوٹ ہے۔ اس تناظر میں مظلوم قوم کی حمایت عالم اسلام کا دینی فریضہ ہے۔
آغا صاحب نے کہا کہ جبر و تسلط اور توسیع پسندانہ عزائم کے حوالے سے اسرائیل اور ان کے پوشیدہ ساتھی ایک ہی سکے کے دو رُخ ہیں۔
آغا صاحب نے غزہ عوام پر جاری فضائی جارحیت اور مسلمان ممالک کی مجرمانہ خاموشی کی شدید الفاظ میں مذمت کی۔
جن دیگر مقامات پر یوم قدس کی مناسبت سے جلوس نکالے گئے ان میں قدیمی امام باڑہ حسن آباد،امام بارگاہ یاگی پورہ ماگام،آستانہ شریف چاڈورہ، جامع مسجد سونہ پاہ بیروہ،امام باڑہ گامدو سوناواری بانڈی پورہ ،جامع مسجد نوگام بانڈی پورہ ،امام باڑہ کمل کوٹ اوڑی بارہمولہ ، امام بارہ صوفی پورہ پہلگام اننت ناگ امام باڑہ پونچھ گنڈ بیروہ و دیگر مرکزی جمعہ اجتماعات شامل ہیں جہاں ائمہ جمعہ حضرات نے کہا کہ اسرائیل نے مسلمانوں کے قبلہ اول مسجد اقصیٰ پر بھی غاصبانہ قبضہ کیا جہاں مسلمانوں کو آزادانہ طور پر عبادات انجام دینے کی اجازت نہیں، بلکہ کئی بار مسجد کے اندر بھی نمازیوں پر اسرائیلی فوج نے بے تحاشہ فائرنگ کی ہے صیہونی مظالم کی وجہ سے لاکھوں فلسطینی ملک سے ہجرت کرنے پر مجبور ہوئے اور آج فلسطینی عوام جس کسمپرسی کے عالم میں جی رہے ہیں وہ بذاتِ خود صیہونیت کے منہ پر ایک طمانچہ ہے۔
آپ کا تبصرہ