حوزہ نیوز ایجنسی کی رپورٹ کے مطابق، مولانا سید احمد علی عابدی نے خوجہ جامعہ مسجد ممبئی میں نمازِ جمعہ کے خطبوں میں ایام فاطمیہ کی مناسبت سے کہا کہ ایام عزائے فاطمی ایک درس، ایک عبرت اور ایک تعلیم ہے۔
انہوں نے ایام عزائے فاطمی کا ذکر کرتے ہوئے کہا کہ حضرت فاطمہ زہرا سلام اللہ علیہا کی شہادت کے ایام ہیں۔ جو لوگ بھی اس سلسلہ میں مجلسیں کر رہے ہیں، عزاداری کر رہے ہیں یا کوئی اور خدمت انجام دے رہے ہیں خداوند عالم ان تمام خدمات کو قبول فرمائے اور ان کی توفیقات میں اضافہ فرمائے۔
مولانا سید احمد علی عابدی نے مزید کہا کہ یہ دن صرف ایک یادگار نہیں ہیں بلکہ ایک درس ہے، عبرت ہے، ایک تعلیم ہے جو ہم سب کو حاصل کرنا ہے۔ ایسا نہیں ہے کہ صرف آئے، بیٹھے، روئے اور چلے گئے۔ اگرچہ بیٹھنے اور رونے کا بھی ثواب ہے، لیکن اگر ہم چاہتے ہیں کہ ہم اس سے زیادہ ثواب حاصل کریں اور ہماری زندگی اور زیادہ پرسکون ہو تو ہمیں چاہیے کہ ہم صدیقہ طاہرہ حضرت فاطمہ زہرا سلام اللہ علیہا کی حیات طیبہ کا غور سے مطالعہ کریں۔
حضرت فاطمہ زہرا سلام اللہ علیہا کی سیرت پر عمل کی تاکید کرتے ہوئے مولانا سید احمد علی عابدی نے کہا کہ ہمیں چاہیے کہ ہم حضرت فاطمہ زہرا سلام اللہ علیہا کی سیرت پر چلیں، تاکہ ہم بھی اس راستے پر چلیں جس راستے پر اہل بیت علیہم السلام چلتے تھے اور یقین کر لیں کہ اہل بیت علیہم السلام کے راستے سے بہتر دنیا میں کسی کا راستہ نہیں ہے۔ اہل بیت علیہم السلام کے راستے کے علاوہ کوئی راستہ نہ نجات دلا سکتا ہے اور نہ ہی جنت تک پہنچا سکتا ہے۔
حضرت فاطمہ زہرا سلام اللہ علیہا کی حدیث "عورت کے لئے سب سے بہتر ہے کہ نہ اسے کوئی نامحرم دیکھے اور نہ ہی وہ کسی نامحرم کو دیکھے۔" بیان کرتے ہوئے مولانا سید احمد علی عابدی نے کہا کہ عورت کے لئے سب سے بہتر حجاب ہے۔ حجاب فیشن نہیں، بلکہ واجب ہے۔
انہوں نے دور حاضر کی بے حجابی کا ذکر کرتے ہوئے کہا کہ جیسے جیسے انسان کی دنیوی دولت و شہرت میں اضافہ ہوتا ہے؛ حجاب کم ہوتا چلا جاتا ہے، جبکہ اسلام میں حجاب واجب ہے۔
اسلامی اور غیر اسلامی تہذیب و احکام کا ذکر کرتے ہوئے مولانا سید احمد علی عابدی نے کہا کہ دنیا میں انسان جیسے جیسے ترقی کرتا ہے اس کو چھوٹ بھی زیادہ ملتی ہیں لیکن اسلام میں انسان جس قدر بلندی حاصل کرتا ہے اس سے توقعات بھی بڑھ جاتی ہے اور اس کی ذمہ داریوں میں اضافہ ہو جاتا ہے۔
آپ کا تبصرہ