حوزہ نیوز ایجنسی کی رپورٹ کے مطابق مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ علامہ طالب جوہری کی وفات سے پاکستان ایک جید عالم دین محب وطن خطیب اور اتحاد بین المسلمین کے داعی سے محروم ہوگیا۔ علامہ طالب جوہری نے طویل عرصے تک قرآن کریم کی تعلیمات کی روشنی میں عصر حاضر کے تقاضوں سے ہم آہنگ ہو کر عوام کی دین کی طرف رہنمائی کی۔ ان کے سامعین میں ہر مکتب اور مسلک کے عوام شریک ہوتے تھے وہ محبت اور اتحاد کے علمبردار تھے۔ انہوں نے ہمیشہ قرآنی تعلیمات اور دین اسلام کی تشریح اور تفسیر فرقہ وارانہ منافرت سے بالاتر ہوکر کی۔ وطن عزیز پاکستان آج ایک ساز شخصیت سے محروم ہو گیا۔
انہوں نے کہا کہ علامہ سید علی نقی نقن اور علامہ رشید ترابی کے بعد علامہ طالب جوہری نے نے دین اسلام کے علمی اور فکری مفاہیم کو انتہائی سلیس اور عوامی انداز میں عوام کے سامنے پیش کیا آپ کی مجالس عزا بہ یک وقت اہل علم اور عوام دونوں کے لئے رہنمائی کا ذریعہ تھیں۔
علامہ طالب جوہری نے عوام کے دلوں کو عشق اہل بیت کے نور سے منور کیا آپ کربلا اور مودت اھل بیت کے بہترین مبلغ تھے۔ آپ مودت آل محمد ع کے نور کو دنیا تک پھیلاتے رہے۔ ہم علامہ طالب جوہری کی وفات کے سانحے پر ان کے غم میں پوری ملت اور انکے خانوادے کے ساتھ برابر کے شریک ہیں۔