حوزہ نیوز ایجنسی کی رپورٹ کے مطابق، فلسطینی تنظیم حماس کے رہنما خالد مشعل نے کہا ہے کہ مسجد اقصیٰ میں صیہونیوں کے غیر قانونی داخلے کے واقعات میں اضافہ اسرائیل کا خطرناک اقدام ہے، وہ دراصل آگ سے کھیل رہا ہے۔
حال ہی میں صیہونی بستیوں کے مکین اسرائیلی سکیورٹی فورسز کی نگرانی میں مسجد اقصیٰ میں داخل ہوئے جس سے فلسطینیوں میں غصے کی لہر دوڑ گئی۔
خالد مشعل نے کہا کہ فلسطینیوں کی مزاحمت کی وجہ سے اب تک اسرائیل کو مسجد اقصیٰ میں من مانی حرکتیں کرنے کا موقع نہیں ملا اور آئندہ بھی ایسا کرنے کی اجازت نہیں دی جائے گی، فلسطینی مزاحمت اسرائیل کے سامنے سب سے بڑا چیلنج رہے گی۔
اسرائیل کے ساتھ بعض عرب ممالک کے تعلقات کی بحالی کے بارے میں انہوں نے کہا کہ اس سے صیہونیوں کی جرات بڑگ گئی ہے اور وہ بار بار مسجد اقصیٰ کی بے حرمتی کر رہے ہیں۔
خالد مشعل نے کہا کہ عید اور دیگر تہواروں کے نام پر صہیونی مسجد الاقصی میں داخل ہونے اور مسجد کو نقصان پہنچانے کی کوشش کرتے ہیں تاکہ وہ عبادت گاہ بنائیں جس کا دعویٰ کرتے ہیں۔
حماس رہنما نے کہا کہ 2017 سے مسجد الاقصی میں غیر قانونی طور پر داخل ہونے والے صہیونیوں کی تعداد میں تیزی سے اضافہ ہوا ہے۔ انہوں نے فلسطینیوں پر زور دیا کہ وہ مسجد اقصیٰ پہنچیں اور ہر میدان میں اسرائیلی تجاوزات کا مقابلہ کریں۔
خالد مشعل نے عرب ممالک سے کہا کہ وہ اسرائیل کے ساتھ تعلقات کبھی بحال نہ کریں، یہ بہت غلط بات ہوگی۔
اسرائیلی وزیراعظم بنیامین نیتن یاہو نے نیویارک میں اقوام متحدہ کی جنرل اسمبلی کے اجلاس میں دعویٰ کیا کہ اسرائیل کے عرب ممالک کے ساتھ مشترکہ مفادات ہیں اور اس سے جامع امن کے قیام کے امکانات پیدا ہوتے ہیں۔
انہوں نے دعویٰ کیا کہ بہت جلد سعودی عرب کے ساتھ اسرائیل کے تعلقات کی بحالی کے معاہدے پر دستخط ہونے والے ہیں۔
