حوزه نیوز ایجنسی کی رپورٹ کے مطابق، مجلس وحدت مسلمین عزاداری ونگ جنوبی پنجاب کے صدر وممبر ڈویژنل امن کمیٹی ملتان انجینئر سخاوت علی سیال نے کہا ہے کہ اسرائیل کل بھی ایک ناجائز ریاست تھی اور وہ آج بھی ناجائز ہے، پوری دنیا کے غاصب اسرائیل کے حامی ہیں، ہم سلام پیش کرتے ہیں غیور فلسطینیوں پر جو میدان عمل میں ڈٹے ہوئے ہیں اور اپنے آپ کو سپر پاور کہنے والوں کو دن میں تارے دکھا دیے ہیں، امریکہ و اسرائیل اقوام عالم میں فلسطین کو تنہا کرنے کی سازشیں کر رہے ہیں۔
انکا کہنا تھا کہ اسرائیل کے خلاف فلسطینی مزاحمتی تنظیموں کی جوابی کاروائیاں فلسطینی عوام کا حوصلہ بلند کریں گی، غزہ سمیت کئی فلسطینی علاقے مسلسل اسرائیلی جارحیت کا شکار ہیں، چند عرب ممالک اسرائیل کو تسلیم کرکے مسلم امہ کو دھوکا دے رہے ہیں۔
انہوں نے مزید کہا کہ ملک خداداد پاکستان کی عوام اپنے فلسطینی بھائیوں کے شانہ بشانہ کھڑے ہیں، پاکستان کی عوام اسرائیل کو تسلیم کرنے کی ہرسازش کو ناکام بنا دیں گے۔ پاکستانی قوم کل بھی غیور فلسطینیوں کے ساتھ تھی اور آج بھی ان کے ساتھ کھڑی ہے، وہ عرب ممالک جو چند ٹکوں کی خاطر اسرائیل کی حمایت کررہے ہیں اب اُنہیں مزید بے نقاب کرنے کا وقت ہے۔
