حوزہ نیوز ایجنسی کی رپورٹ کے مطابق، ایام فاطمیہ ؑ کی مناسبت سے جموں و کشمیر انجمنِ شرعی شیعیان کے زیر اہتمام مرکزی امام باڑہ بڈگام، امام باڑہ یاگی پورہ ماگام اور شولی پورہ بڈگام میں مجالسِ عزاء کا انعقاد ہوا، جن میں ہزاروں کی تعداد میں عقیدت مندوں نے شرکت کی۔
اس موقع پر انجمنِ شرعی سے وابستہ ذاکرین نے مرثیہ خوانی کی اور انجمن کے صدر حجت الاسلام والمسلمین آغا سید حسن الموسوی الصفوی نے مرکزی امام باڑہ بڈگام میں شہزادی کونین جناب سیدہ فاطمۃ الزھرا ؑ کی سیرتِ طیبہ اور شان و عظمت کے مختلف پہلوؤں پر تفصیل سے روشنی ڈالی۔
انہوں نے جناب سیدہ ؑ کا زہد و تقویٰ سخاوت و کریمی عشق و عرفان الٰہی اور دین و ملت کے حوالے سے فکرمندی کو اعلیٰ ترین نمونۂ عمل قرار دیتے ہوئے واضح کیا کہ ایک صالح اسلامی معاشرے کی تعمیر کے لیے خاتون جنت جناب سیدہ فاطمہ ؑ کے کردار و عمل کے سوا کوئی بھی نتیجہ خیز لائحہ عمل نہیں ہو سکتا۔
انہوں نے کہا کہ سیرت فاطمہ ؑ اور اور ان کے مقام و منزلت کی طرف لوگوں کو متوجہ کرکے نہایت آسانی کے ساتھ سماجی بدعات اور اخلاقی بے راہ روی کا خاتمہ کیا جا سکتا ہے۔
انجمنِ شرعی شیعیانِ جموں وکشمیر کے صدر نے کہا کہ سیدہ فاطمہ ؑ فرائض و حقوق نسوان کی سب سے عظیم المرتبت ترجمان ہیں، جس نے خواتین کے لیے اسلام میں مختص کیے گئے حقوق کے قوانین کو بحال رکھنے کے لیے نہایت تکلیف دہ حالات کا سامنا کیا، رسول اسلام ؐ کی اس برگزیدہ بیٹی اور خواتین عالم کی سردار جناب فاطمہؑ کے تئیں خراجِ عقیدت اور ان کی سیرت کا ایک اہم تقاضا یہ ہے کہ ہم خواتین کے حقوق کی پاسداری کریں اور ان حقوق کی ادائیگی کے سلسلے میں کسی وسوسے کا شکار نہ ہو جائیں۔
آپ کا تبصرہ