حوزہ نیوز ایجنسی کی رپورٹ کے مطابق، ام الائمہ، صدیقہ شہیدہ، جگر گوشہ رسول حضرت فاطمه زہراء سلام اللہ علیہا کی دلسوز شہادت اور ایام عزائے فاطمیہ کی اختتامی دن کے مناسبت سے جمعیت العلماء اثنا عشریہ کرگل کے بینر تلے جلوس عزاء کا اہتمام کیا گیا، جس میں ضلع کرگل کے مختلف علاقوں سے ہزاروں کی تعداد میں عاشقان و محبان حضرت فاطمه زہراء سلام اللہ علیہا نے شرکت کی اور نوحہ خوانی، سینہ زنی اور سروں کو پیٹتے ہوئے مہدی موعود امام زمانہ عجل اللہ تعالیٰ فرجہ الشریف کے محضر مبارک میں آپ کی جدہ ماجدہ کی دلسوز شہادت پر تعزیت اور تسلیت پیش کرتے ہوئے تاریخ اسلام کے سیاہ ترین اور نا بھولنے والے واقعے کو یاد کیا۔
مکمل تصاویر دیکھیں:
کارگل میں ایام فاطمیہ کی مناسبت سے مجالسِ عزاء اور جلوسِ عزاء برآمد
ایام عزائے فاطمیہ کی مناسبت سے حوزہ علمیه اثنا عشریہ کرگل میں 13 جمادی الاول سے 3 جمادی الثانی 1447 ہجری تک مسلسل 20 مجالسِ عزائے فاطمی کی انعقاد کے بعد آخری روز حوزہ علمیہ اثنا عشریہ کرگل میں مجلسِ عزا کے بعد صبح 11 سے مرکزی جلوس عزاء برآمد ہوا اور حضرت فاطمه زہراء (س) چوک کی طرف سے ضلع کے مختلف علاقوں، کرگل ٹاؤن اور گردونواح سے آئے ماتمی جلوسوں کے ہمراہ اثنا عشریہ چوک پر جمع ہوئے۔
مرکزی جلوس عزائے فاطمی اثنا عشریہ چوک سے شروع ہوکر خمینی چوک اور مرکزی بازار سے ہوتے ہوئے انقلاب منزل پہنچا، جہاں مختصر ذکر مصائب اور زیارت کے ساتھ جلوس عزاء اختتام پذیر ہوا۔
اس موقع پر جوانانِ اثنا عشریہ نے جلوس عزاء کے انتظامی امور کو احسن طریقے نبھایا ان جوانوں نے حوزہ علمیہ اثنا عشریہ کرگل کے احاطے اور مرکزی بازار کو کالے بینروں اور علم سے سجایا تھا جس نے ایام عزا کے فضا کو اور بھی سوگوار کیا۔
انقلاب منزل میں انصار المہدی جوانان اثنا عشریہ کے رضاکاروں کی طرف سے تبرکات کا بھی انتظام کیا گیا تھا اور ضلع انتظامیہ کے مختلف محکمہ جات کی طرف سے بھی انتظامات دیکھا گیا۔
جلوس عزاء کے آخر میں کرگل کے معروف نوحہ خواں آخوند باقر زیشان اور ساتھیوں نے بہترین انداز سے دستہ جمی نوحہ خوانی کی اور عزاداران نے منظم طریقے سے سینہ زنی کرتے ہوئے امام زمانہ (عج) کے حضور آپ کی جدہ ماجدہ کی دلسوز شہادت پر تعزیت پیش کی اور پرسہ دیا- جمعیت العلماء اثنا عشریہ کرگل کے صدر حجت الاسلام والمسلمين شیخ ناظر مہدی محمدی نے زیارت حضرت زہراء (س) سے عزاداروں کے دلوں کو منور کیا اور مختصر ذکر مصائب کے ساتھ ایام فاطمیہ کی مجالس اور عزاداری کا یہ سلسلہ اپنے اختتام کو پہنچا۔
آخر میں جمعیت العلماء اثنا عشریہ کرگل کے جنرل سیکرٹری اور مرکزی امام جمعہ کرگل حجۃ الاسلام والمسلمين شیخ ابراہیم خلیلی نے جلوس عزاء کو احسن طریقے سے انقلاب منزل تک پہنچانے اور مجالسِ ایام فاطمیہ کے انعقاد میں بہترین کارکردگی اور تعاون پر انصار المہدی جمعیت العلماء اثنا عشریہ کرگل، خدمت گزارانِ اہل البیت جمعیت العلماء اثنا عشریہ، حسینی تبرک کمیٹی جمعیت العلماء اثنا عشریہ، جوانان اثنا عشریہ کرگل اور اثنا عشریہ نیٹورک جمعیت العلماء، ضلع انتظامیہ کرگل کے مختلف محکمہ جات جن میں محکمہ پولیس، محکمہ صحت، محکمہ انفارمیشن، محکمہ بجلی وغیرہ، پریس کلب آف لداخ کرگل سے منسلک پرنٹ اور الیکٹرانک میڈیا کے نمائندے، آل انڈیا ریڈیو کرگل اور ان تمام لوگوں کا شکریہ ادا کیا، جنہوں نے اس جلوس عزاء کو کامیاب بنانے میں بھرپور تعاون کیا۔
آپ کا تبصرہ