حوزہ نیوز ایجنسی کی رپورٹ کے مطابق، حوزوی اداروں کی رابطہ کونسل کی جانب سے عالمی استکبار کے خلاف جدوجہد کے قومی دن کے موقع پر جاری بیان میں کہا گیا ہے کہ ۱۳ آبان ایرانی قوم کی عزت، استقامت اور استکبار مخالف جدوجہد کی علامت ہے۔
بیان میں کہا گیا ہے کہ ۱۳ آبان کی تاریخ تین اہم واقعات سے جڑی ہوئی ہے۔ ۱۳۴۳ ہجری شمسی میں امام خمینیؒ کو ترکیہ جلاوطن کیا گیا، ۱۳۵۷ ہجری شمسی میں طلبہ کا قتل عام ہوا اور ۱۳۵۸ ہجری شمسی میں امریکی سفارت خانے پر قبضہ کیا گیا۔ ان واقعات نے اس دن کو ایرانی قوم کی مزاحمت اور دشمنوں کے خلاف جدوجہد کی علامت بنا دیا ہے۔
بیان میں امام خمینیؒ کے حوالے سے کہا گیا ہے کہ امریکہ اور اسرائیل اسلام کی بنیاد کے دشمن ہیں، کیونکہ وہ اسلام، قرآن اور سنت کو اپنے مفادات اور لوٹ مار کی راہ میں رکاوٹ سمجھتے ہیں۔ امام خمینیؒ کے مطابق ایران نے قرآن و سنت کی پیروی کرتے ہوئے ان کے خلاف قیام کیا، انقلاب برپا کیا اور کامیابی حاصل کی۔
حوزوی اداروں کی رابطہ کونسل نے اپنے بیان میں فلسطینی عوام کی مزاحمت کو بھی خراجِ تحسین پیش کیا اور کہا کہ عالمی استکبار اور اسرائیل کے زیرِ تسلط مظلوم اقوام، بالخصوص فلسطینی عوام، اسلامی انقلاب سے متاثر ہو کر بیدار ہوئی ہیں اور اپنے مستقبل کا فیصلہ خود کرنے کے لیے جدوجہد کر رہی ہیں۔
بیان میں مزید کہا گیا ہے کہ فلسطینی عوام اور مجاہدین کی مزاحمت نے اسلامی تاریخ میں ایک اہم باب رقم کیا ہے اور دنیا کے سامنے مسلمانوں کی عظمت کو اجاگر کیا ہے۔
حوزوی اداروں کی رابطہ کونسل نے امام خمینیؒ اور انقلاب اسلامی کے شہدا کی قربانیوں کو خراجِ عقیدت پیش کرتے ہوئے امریکہ اور اسرائیل کے خلاف مسلم اقوام کی مزاحمت اور انقلاب اسلامی کے اصولوں سے وابستگی پر زور دیا۔
بیان میں ایرانی عوام، بالخصوص علما، دینی طلبہ، یونیورسٹیوں اور اسکولوں کے طلبہ سے اپیل کی گئی ہے کہ وہ ۱۳ آبان کی تقریبات میں بھرپور شرکت کریں، امریکہ، اسرائیل اور عالمی استکبار کے اقدامات کی مذمت کریں اور مظلوم فلسطینی عوام کے ساتھ یکجہتی کا اظہار کریں۔
بیان کے آخر میں قم کے علما، دینی طلبہ اور عوام کو حضرت فاطمہ معصومہؑ کے حرم میں منعقد ہونے والی یوم اللہ ۱۳ آبان کی تقریب میں شرکت کی دعوت دی گئی ہے۔
آیت اللہ علیرضا اعرافی
سربراہ، حوزوی اداروں کی رابطہ کونسل
تاریخ: ۱۰ آبان ۱۴۰۲ (یکم نومبر ۲۰۲۳ء)
آپ کا تبصرہ