حوزہ نیوز ایجنسی کی رپورٹ کے مطابق، مدرسہ جامعۃ المصطفٰی خاتم النبیین جیکب آباد میں مجلسِ وحدت مسلمین پاکستان کے مرکزی رہنما علامہ مقصود علی ڈومکی کی زیر صدارت، پیغامِ کربلا و جشنِ فتح اسلامی جمہوریہ ایران کے عنوان سے ایک کانفرنس منعقد ہوئی۔
اس موقع پر عالم اسلام، غیور ایرانی قوم، فلسطینی عوام، اور غزہ کے مظلومین کو صبر، استقامت اور ایمان کی بدولت حاصل ہونے والی تاریخی فتح پر دلی مبارکباد پیش کی گئی۔
کانفرنس میں مجلس وحدت مسلمین عزاداری ونگ سندھ کے صوبائی نائب صدر سید غلام شبیر نقوی، ایم ڈبلیو ایم ضلع جیکب آباد کے صدر نظیر حسین جعفری، نائب صدر استاد خادم حسین برڑو، مہران سوشل فورم کے چیئرمین ایڈوکیٹ عبدالحئی سومرو؛ ال ڈومکی اتحاد کے سینیئر وائس چیئرمین حاجی شاہ مراد ڈومکی، ضلع صدر منصب علی ڈومکی، یوتھ ونگ کے صدر میر مظفر حسین ٹالانی، مجلس علمائے مکتب اہل بیت ضلع جیکب آباد کے صدر علامہ حاجی سیف علی ڈومکی، جامع مسجد امام حسن مجتبیٰؑ کے خطیب مولانا منور حسین سولنگی سمیت دیگر سیاسی مذہبی رہنما شریک ہوئے۔
اس موقع پر کانفرنس خطاب کرتے ہوئے علامہ مقصود علی ڈومکی نے کہا کہ "نواسۂ رسول حضرت امام حسین علیہ السلام کا پیغام آج بھی عالمِ انسانیت کے لیے مشعلِ راہ ہے۔ امام حسینؑ کسی ایک فرقے یا قوم کے نہیں، بلکہ تمام انسانوں کے رہبر و نجات دہندہ ہیں۔ پیغامِ کربلا کو سمجھنے کے لیے امام حسینؑ کے اقوال، ارشادات اور عملی سیرت بہترین رہنمائی فراہم کرتے ہیں۔
انہوں نے کہا کہ امام حسینؑ انبیائے کرام علیہم السلام کے وارث ہیں؛ آپ نے حضرت ابراہیم خلیل اللہ کی سنت پر عمل کرتے ہوئے وقت کے نمرود کے خلاف قیام کیا، حضرت موسیٰ کلیم اللہ کے وارث بن کر وقت کے فرعون کو للکارا اور میدانِ کربلا میں 72 جانثاروں کے ساتھ یزید کی نو لاکھ فوج اور اس کی جابر سلطنت کو ذلت آمیز شکست دی۔
انہوں نے کہا کہ آج رہبرِ مسلمین آیت اللہ العظمیٰ سید علی خامنہ ای اسی حسینی پیغام کو لے کر عصرِ حاضر کے یزید، امریکہ و اسرائیل، کے خلاف ڈٹ کر کھڑے ہیں۔ انہوں نے مظلوم فلسطینیوں کی حمایت کر کے اسرائیل کو رسوا اور ذلیل کیا، جس پر پوری امت مسلمہ انہیں سلام پیش کرتی ہے۔ اسلامی انقلاب کی یہ فتح صرف ایران کی نہیں، بلکہ عالمِ اسلام کی اجتماعی کامیابی ہے۔ یہ معرکہ استقامت، شعور، اور ایمان کا عکاس ہے۔
آخر میں مقررین نے اس عزم کا اظہار کیا کہ ہم امام حسینؑ کے مشن، مظلومینِ جہان کی حمایت اور سامراجی قوتوں کی مخالفت میں ہمیشہ استقامت کا مظاہرہ کرتے رہیں گے۔
آپ کا تبصرہ