حوزہ نیوز ایجنسی کی رپورٹ کے مطابق، کندھ کوٹ ضلع کشمور میں ایک پریس کانفرنس میں، ایم ڈبلیو ایم پاکستان کے رہنما نے ٹرمپ کی رہبر انقلاب کی شان میں گستاخی کو ایک سنگین جرم قرار دیا اور کہا کہ اس گستاخی کا ردعمل دنیا بھر میں موجود کروڑوں عاشقان دیں گے۔ ولی امر مسلمین صرف ایران کے نہیں، بلکہ پوری امت مسلمہ کے سپریم لیڈر ہیں۔
مجلس وحدت مسلمین پاکستان کے مرکزی رہنما علامہ مقصود علی ڈومکی نے کندھ کوٹ میں سردار حیدر علی خان جکھرانی سے ان کے کزن راجہ دین محمد جکھرانی کی وفات پر تعزیت کی۔
اس موقع پر انہوں نے ضلعی صدر میر فائق علی خان جکھرانی اور دیگر کے ہمراہ ایک پروقار پریس کانفرنس سے خطاب کیا جس میں موجودہ ملکی و مقامی صورتحال پر تفصیلی اظہارِ خیال کیا۔
علامہ مقصود ڈومکی نے کہا کہ"ضلع کشمور، کندکوٹ اور پورے سندھ میں امن و امان کی صورت حال نہایت خراب ہو چکی ہے۔ دن دہاڑے مین روڈز پر مسافروں اور بچوں کو لوٹا جا رہا ہے، مین روڈ پر دن دھاڑے بسوں کو روک کر 300 مسافروں کو لوٹا جاتا ہے۔ خواتین کے زیورات اتارے جا رہے ہیں، مگر حکومت اور ریاستی ادارے تماشائی بنے بیٹھے ہیں۔"
انہوں نے بدامنی کی مسلسل وارداتوں پر شدید غم و غصے کا اظہار کرتے ہوئے کہا کہ"آج جماعت اسلامی سندھ کے صوبائی نائب امیر حافظ نصراللہ چنا کو دن دیہاڑے لوٹ لیا گیا۔ ان کی گاڑی، موبائل اور نقد رقم چھین لی گئی۔ اب کوئی شہری یہاں محفوظ نہیں رہا۔" ایک دن میں یہاں ایک درجن وارداتیں ہوتی ہیں۔
علامہ ڈومکی نے کہا کہ "ماہ محرم سے صرف چند دن پہلے ایسی صورتحال ہم سب کے لیے، بالخصوص عزاداروں، علماء، ذاکرین، اور جلوسوں میں شریک عوام کے لیے خطرے کی گھنٹی ہے۔ رات کے وقت مجالس اور سفر کرنے والے خطباء و علماء مکمل طور پر غیر محفوظ ہو چکے ہیں۔"
انہوں نے مطالبہ کیا کہ "حکومت سندھ فوری طور پر ایامِ عزا میں عزاداروں، ذاکرین اور علماء کی سیکیورٹی کے لیے خصوصی انتظامات کرے۔
علامہ مقصود ڈومکی نے شدید الفاظ میں مذمت کرتے ہوئے کہا کہ محرم سے چند دن پہلے کلعدم دہشت گرد جماعت نے شہداد کوٹ اور کندھ کوٹ میں جلسہ کیا، عوامی اجتماعات میں اکابرین اور علماء کو سرعام دھمکیاں دیں۔ یہ ایک ناقابلِ قبول اور خطرناک عمل ہے۔"
انہوں نے مطالبہ کیا کہ متعلقہ کالعدم جماعت کے خلاف فوری ایف آئی آر درج کی جائے!
شرپسند عناصر کے نام شیڈول فور میں شامل کیے جائیں!
شہداد کوٹ اور کندھ کوٹ میں کی گئی شرانگیزی پر بھرپور قانونی کارروائی کی جائے!
انہوں نے پنجاب حکومت کی طرف سے عزاداری و چہلم کے متعلق جاری کردہ متنازعہ مراسلے کو شدید تنقید کا نشانہ بناتے ہوئے کہا کہ "نون لیگ کی حکومت تعصب پر مبنی کاروائیوں اور عزاداروں پر مقدمات کے سلسلے کو بند کرے۔ ہم ان غیر آئینی ہتھکنڈوں کو مسترد کرتے ہیں۔"
پریس کانفرنس کے دوران علامہ مقصود ڈومکی نے بین الاقوامی امور پر بات کرتے ہوئے کہا کہ "میں پاکستان کے عوام کی جانب سے اپنے برادر اسلامی ملک اسلامی جمہوریہ ایران کے عوام اور افواج کے ساتھ مکمل اظہارِ یکجہتی کرتا ہوں۔"
انہوں نے کہا کہ "رہبر مسلمین حضرت آیت اللہ سید علی خامنہ ای صرف ایران کے نہیں، بلکہ پوری امت مسلمہ کے سپریم لیڈر ہیں۔ صدر ٹرمپ کی جانب سے ان کی شان میں گستاخی سنگین جرم ہے جس کا ردعمل دنیا بھر میں موجود کروڑوں عاشقان دیں گے۔ "آیت اللہ سید علی خامنہ ای حضرت امام مہدی عجل اللہ تعالیٰ فرجہ الشریف کے نائب ہیں، اور وہ ہماری ریڈ لائن ہیں۔
اس پریس کانفرنس میں مجلس وحدت مسلمین کے ضلعی رہنما میر فائق علی خان جکھرانی، میر نجم دین جکھرانی، بابر علی ملک، مجلس علماء مکتب اہل بیت کے ضلعی رہنما علامہ سیف علی ڈومکی اور ایم ڈبلیو ایم کے صوبائی رہنما علامہ سہیل اکبر شیرازی بھی شریک تھے۔
آپ کا تبصرہ