حوزہ نیوز ایجنسی کی رپورٹ کے مطابق، سول ہسپتال روڈ جیکب آباد پر منعقدہ سالانہ مجلسِ عزا سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ "آلِ محمدؐ سے محبت ایمان کی علامت ہے، جبکہ آلِ محمدؐ سے بغض اور دشمنی نفاق کی نشانی ہے۔ نواسۂ رسول، امام حسینؑ سے عداوت رکھنے والے آج بھی وقتاً فوقتاً اپنے باطنی ناپاک خیالات کا اظہار کرتے رہتے ہیں۔"
انہوں نے کہا کہ امت مسلمہ کو ناصبی فکر سے بچنے کے لیے ذکرِ اہل بیتؑ اور ذکرِ امام حسینؑ کے اجتماعات میں بھرپور شرکت کرنی چاہیے کیونکہ امام حسینؑ کشتیٔ نجات اور شمعِ ہدایت ہیں، اور ان کی مجالس اور جلوس امت کی ہدایت و اصلاح کا ذریعہ ہیں۔
علامہ مقصود علی ڈومکی نے پنجاب کے مختلف اضلاع میں مجالسِ عزا کے خلاف درج ہونے والے مقدمات کی شدید مذمت کرتے ہوئے کہا کہ "پنجاب حکومت کی ذکرِ امام حسینؑ سے دشمنی اور بغض کا رویہ پوری قوم دیکھ رہی ہے، اور اس پر شدید عوامی ردِعمل آئے گا۔ ذکرِ امام حسینؑ کو جرم قرار دینے والے اپنے کردار اور افکار پر شرم کریں۔"
انہوں نے کہا کہ ذکرِ امام حسینؑ افضل ترین عبادت ہے اور اس عبادت پر ایف آئی آر درج کرنا نہایت افسوسناک اور شرمناک عمل ہے۔
اس موقع پر انہوں نے رہبر معظم حضرت آیت اللہ العظمٰی سید علی خامنہ ای کی شان میں کی جانے والی امریکی و اسرائیلی ہرزہ سرائی کی سخت الفاظ میں مذمت کرتے ہوئے کہا کہ "رہبر معظم آیت اللہ خامنہ ای نائبِ امام اور پورے عالمِ اسلام کے رہبر و رہنما ہیں۔ اُن کی شان میں گستاخی امت مسلمہ کے لیے ناقابلِ برداشت ہے، اور ہم مراجع کرام و مجتہدین عظام کی قیادت میں اس کی پرزور مذمت کرتے ہیں۔"
آپ کا تبصرہ