حوزہ نیوز ایجنسی کی رپورٹ کے مطابق، ولادتِ باسعادت سرور کونین، سید الانبیاء، رحمت اللعالمین حضرت محمد مصطفٰی صلی اللّٰہ علیہ وآلہ وسلّم کی مناسبت سے ملی یکجہتی کونسل پاکستان کے زیرِ اہتمام اور مجلس وحدت مسلمین پاکستان کی میزبانی میں سالانہ عظیم الشان اجتماع بعنوانِ ”عشقِ پیغمبرِ اعظم مرکز وحدت مسلمین“ کانفرنس کا انعقاد ہوا، جس میں ملک بھر کی مذہبی و سیاسی جماعتوں کے قائدین، علمائے کرام و مشائخ عظام اور مرکزی رہنما نے شرکت اور خطاب کیا۔
کانفرنس میں تمام مکاتب فکر کی خواتین اور حضرات نے بڑی تعداد میں شرکت کی۔
کانفرنس سے سربراہ مجلس وحدت مسلمین سینیٹر علامہ راجہ ناصر عباس نے خطاب کرتے ہوئے کہا کہ اس وقت بشریت ظلم و استبداد کی چکی کے دو پاٹوں میں پس رہی ہے اور ویسٹ کی برہنہ تہذیب کے ظلم وجبر کا شکار ہے، اس ظلم کی جڑیں مغربی تہذیب میں ہیں، لوگ سمجھتے تھے کہ مغرب نے اپنی ترقی سے دنیا کو جنت بنا دیا ہے، لیکن مغرب نے اپنا مکروہ چہرہ میڈیا کے لبادے میں چھپایا ہوا ہے؛ جب یہ ہمارے نبی ختمی المرتبت کی شان میں گستاخی کرتے ہیں تو اپنی مغربی تہذیب کے برہنہ پن کو واضح کرتے ہیں۔ ان کی حقیقت آپ غزہ میں دیکھ لیں، جب تک تم ان جیسے نہ ہو جاؤ وہ راضی ہو ہی نہیں سکتے، یہ ہو ہی نہیں سکتا کہ امریکہ اسرائیل کے قطر پر حملے میں ملوث نہ ہو، قطر نے ٹرمپ کو چار سو ملین ڈالر کا جہاز دیا ہے، پھر بھی حملہ ہوا اور مزاحمت کے رہنما شہید ہوئے، یہ امریکہ قابل اعتماد نہیں ہے؛ اپنے وطن کے خزانے ان کے حوالے کر رہے ہو اس کے ساتھ سی آئی اے آئے گی اور حرام ہے یہود ونصاریٰ کو دوست بنانا یہ قرآن کہہ رہا ہے وہ انہیں میں سے ہو جائے گا، یہ دین اور انسانیت سے دور ہیں، ان کی تہذیب میں انسانیت کی تحقیر اور بزدلی، بے وفائی اور بے حرمتی ہے، تحقیر ہے۔
انہوں نے پاکستان میں سیلاب سے متاثرہ افراد کا تذکرہ کرتے ہوئے کہا کہ ہمارے لوگ سیلاب میں تباہ و برباد ہو گئے ہیں، ارمان بہہ گئے ہیں مجبور و بے کس لوگوں کے کوئی پرسان حال نہیں ہے عوام کا، نااہلی اور بدیانتی کی وجہ سے لوگ باربار نقصان اٹھا رہے ہیں سیلاب اور آفات آتی ہیں، لیکن ان کا حکمت عملی کے اور پلاننگ کے ساتھ مقابلہ کیا جاتا ہے، تاکہ نقصان سے محفوظ رہا جا سکے، ان کا خیال رکھنا اور تحفظ حکمرانوں کی ذمہ داری ہے، خبروں کو چھپانے کی بجائے بتایا جاتا ہے، تاکہ لوگ آگے بڑھ کر آفت زدہ عوام کی مدد کر سکیں، جنکی اولاد بچے، بیٹیاں اور خواتین و مرد ڈوب گئے ہیں کیا انکے دل دکھی اور رنجیدہ نہیں ہونگے، ہمیں اس درد کو محسوس کرنا چاہئے لاتعلق نہیں رہنا چاہئے، انہوں نے جلالپور پیروالہ اور علی پور کو ڈبو دیا ہے بہت نقصاو ہوا ہے دلخراش خبریں ابھی آنا شروع ہو رہی ہیں۔
نائب امیر جماعت اسلامی لیاقت بلوچ نے کہا کہ پوری قیادت کو غور کرنا ہو گا کہ امت اور قوم منتشر کیوں ہے، اس کی وجہ یہ ہے کہ نفسا نفسی کی دوڑ ہے ہر کوئی اپنی انا میں ڈوبا ہوا ہے، استعمار ہماری ملت کو ملین ڈالرز خرچ کر کے تقسیم در تقسیم کر رہا ہے، ایران میں جب انقلاب آیا تو پوری مسلم دنیا سمیت پاکستان میں بہت خوشی کا اظہار کیا گیا، لیکن امریکہ نے عظیم الشان اسلامی انقلاب کو شیعہ انقلاب بنا کر پیش کیا کہ یہ اب عربوں کے تخت بہا لے جائے گا۔
انہوں نے مزید کہا کہ ملی یکجہتی کونسل نے اس سازش کو ناکام بنانے کیلئے یہ پلیٹ فارم بنایا، تاکہ آپس کے اختلافات ختم ہوں اور امت میں وحدت پیدا ہو سکے، لیکن ہم معیشت پر اکٹھے نہیں، سود کے نظام پر کھلم کھلا عمل ہو رہا ہے، پارلیمنٹ میں قرآن وسنت کے خلاف قوانین بن رہے ہیں، لیکن عالمی پریشر کی وجہ سے یہ سب رک نہیں رہا، فلسطین اور غزہ کی بربادی پر سب مجرمانہ طور پر دیکھ رہے ہیں۔
انہوں نے عرب کے حالات پر تشویش کا اظہار کرتے ہوئے کہا کہ عرب کہتے رہے کہ حماس اور حزب اللہ ختم ہو جائے ہم معاملات سنبھال لیں گے، لیکن پھر قطر بھی محفوظ نہ رہا، یہ درندہ صفت اسرائیل کا حملہ اب انقرہ و اسلام آباد تک بھی ہو سکتا ہے، سری لنکا، بنگلہ دیش اور اب نیپال کی صورتحال سب کے سامنے ہے۔ ہمارے ابدی دشمن بھی وطن عزیز میں یہ سب دوہرانا چاہتا تھا، لیکن اسے منہ کی کھانی پڑی۔
انہوں نے کہا کہ حکومت سے کہنا چاہتا ہوں لوگ اس غیر آئینی اور ناانصافی کے اقدامات سے تنگ ہیں، لوگ تمہارے کشکول سے بھی تنگ ہیں، لیکن رسول اکرم ص کے خلاف کوئی قانون سازی نہیں ہونے دیں گے اور قادیانیوں کی بھی کوئی سازش کامیاب نہیں ہونے دیں گے۔
انہوں نے کہا کہ اس کانفرنس کا پیغام یہ ہے کہ قرآن و سنت بالا دست ہے، حکومت کو پیغام دیتا ہوں کہ عوام معاشی حوالے سے تنگ ہیں، ناموس مصطفٰی کے قانون میں تبدیلی نہیں ہونے دیں گے۔
انہوں نے مزید کہا کہ ملی یکجہتی کونسل تحفظ ناموسِ رسالت کا ہر اول دستہ ہے، اقلیتوں کی آڑ میں گستاخوں کو قانونی تحفظ نہیں لینے دیں گے۔
کانفرنس سے سربراہ جماعت اہل حرم مفتی گلزار نعیمی، علامہ سید احمد اقبال رضوی، پیر غلام رسول اویسی، ڈاکٹر ضمیر اختر، مولانا طیب شاہ بخاری، سید ناصر عباس شیرازی، انجینئر حمید حسین، علامہ اختر عباس، سید فدا احمد شاہ، علامہ سید اکبر کاظمی، خواجہ مدثر محمود تونسوی، سید عبد الوحید شاہ اور دیگر مقررین نے بھی خطاب کیا۔
آپ کا تبصرہ