حوزہ نیوز ایجنسی کی رپورٹ کے مطابق،رہبر معظم انقلاب اسلامی نے نائیجیریا کی عوامی اسلامی تحریک کے سربراہ سے ملاقات میں تاکید کی ہے کہ فلسطین اور غزہ اسلام کی طاقت کے آئینہ دار ہیں۔

اطلاعات کے مطابق رہبر معظم انقلاب اسلامی حضرت آیت اللہ العظمی سید علی خامنہ ای نے ہفتہ کے روز نائیجیریا کی مقبول اسلامی تحریک کے سربراہ شیخ ابراہیم زکزاکی، ان کی اہلیہ اور بیٹیوں سے ملاقات میں غزہ کی حالیہ صورتحال کی طرف اشارہ کیا اور کہا: حالیہ دنوں میں فلسطین میں رونما ہونے والے واقعات اسلام کی طاقت کی علامتوں میں سے ہیں۔

رہبر معظم نے فلسطین میں ہولناک بم دھماکوں میں شہید ہونے والی خواتین، بچوں اور مردوں کی طرف اشارہ کرتے ہوئے کہا کہ یہ دلخراش واقعات انسانی دلوں کو زخمی کر رہے ہیں، لیکن اس کا ایک اور پہلو بھی ہے اور وہ یہ ہے کہ یہ تمام واقعات فلسطین میں اسلام کی ناقابل یقین طاقت کو ظاہر کرتے ہیں۔

آیت اللہ العظمیٰ سید علی خامنہ ای نے کہا کہ خداوند متعال کے فضل و کرم سے فلسطین میں شروع ہونے والی یہ تحریک آگے بڑھے گی اور فلسطینیوں کی مکمل فتح ہوگی۔ رہبر معظم انقلاب اسلامی نے کہا کہ عالم اسلام میں ہر ایک کا فرض ہے کہ وہ فلسطینی عوام کی مدد کرے، انہوں نے ایران میں اسلامی نظام کی تشکیل اور کئی صدیوں کے بعد اسلامی اصولوں پر مبنی اسلامی حکومت کی تشکیل کو اسلام کی طاقت کا ایک پہلو قرار دیا۔ انہوں نے کہا کہ اسلامی انقلاب اپنے قیام کے بعد سے روز بروز مضبوط تر ہوتا جا رہا ہے اور مستقبل میں مزید مضبوط ہو گا۔

رہبر معظم نے نائجیریا کے شیعہ رہنما شیخ زکزاکی اور ان کے اہل خانہ کی جدوجہد اور قربانیوں کو سراہتے ہوئے کہا کہ آپ اللہ کی راہ میں جدوجہد کرنے والے ایک حقیقی مجاہد کی مثال ہیں اور ہمیں امید ہے کہ آپ اپنی جدوجہد کو جاری رکھیں گے، مستقبل میں بھی کامیاب رہیں گے، نائیجیریا کی اسلامی تحریک کے سربراہ شیخ ابراہیم زکزاکی اور ان کی اہلیہ نے بھی اس ملاقات پر خوشی کا اظہار کرتے ہوئے کہا کہ یہ لمحہ ان کے لیے ایک جذباتی لمحہ ہے جسے الفاظ میں بیان نہیں کیا جا سکتا، انہوں نے کہا کہ ہمیں امید ہے کہ آپ کی دعاؤں، دور اندیشی اور رہنمائی کے ساتھ ساتھ مسلمانوں کی جدوجہد سے اسلام روز بروز پھلے پھولے گا۔