حوزہ نیوز ایجنسی کی رپورٹ کے مطابق، امام جمعہ تہران حجت الاسلام والمسلمین حاج علی اکبری نے نمازِ جمعہ کے خطبوں میں عالمی استکباری قوتوں کے مقابلے میں ایرانی قوم کی استقامت کا تذکرہ کرتے ہوئے کہا ہے کہ ایران کی خودمختار شناخت، انقلابِ اسلامی اور مکتبِ حسینی کی تربیت کا نتیجہ ہے جو عالمی استعمار کے خلاف مزاحمت کی علامت بن چکی ہے اور خطے کی اقوام کے لیے آزادی کا راستہ ہموار کر رہی ہے۔
انہوں نے مزید کہا کہ اسلامی جمہوریہ ایران نے ترقی کی راہ پر تیزی سے قدم بڑھایا اور کبھی ذلت کو قبول نہیں کیا۔
خطیبِ نمازِ جمعہ تہران نے امریکی جاسوسی اڈے (سفارت خانے) پر قبضے کو ایک انقلابی اقدام قرار دیتے ہوئے کہا کہ امریکی سفارت خانے پر قبضے کو امام خمینیؒ نے انقلاب سے بھی بڑا اقدام قرار دیا تھا؛ یہ اقدام نہ صرف تناؤ سے بچنے کا باعث بنا، بلکہ ایران کے خلاف کئی خطرات کو کم کرنے کا ذریعہ بھی ثابت ہوا۔
امام جمعہ تہران نے دفاعِ مقدس اور حالیہ 12 روزہ مزاحمت کی جانب اشارہ کرتے ہوئے کہا کہ ایرانی قوم نے وحدت، یکجہتی اور عسکری طاقت خصوصاً میزائل قوت کے ذریعے عالمی استعمار کو گھٹنے ٹیکنے پر مجبور کیا؛ یہ تجربہ اس بات کا ثبوت ہے کہ مزاحمت جب قومی اتحاد اور طاقت کے ساتھ ہو تو کامیابی یقینی ہوتی ہے۔
خطیبِ نمازِ جمعہ تہران حجت الاسلام حاج علی اکبری نے فلسطینی شہداء اور مجاہدین، خصوصاً شہید یحیٰی السنوار، شہید اسماعیل ہنیہ اور دیگر مزاحمتی رہنماؤں کو خراجِ تحسین پیش کرتے ہوئے کہا کہ ان کی جدوجہد نے مغربی ایشیاء میں استکبار کی تمام سازشوں کو ناکام بنا دیا ہے۔
انہوں نے کہا کہ امریکہ اور صیہونی حکومت کی خبیث فطرت اب بھی جاری ہے، جو جنگ بندیوں کی خلاف ورزی اور مسلسل جرائم کی مرتکب ہورہی ہے۔
حجت الاسلام اکبری نے تحریکِ حماس، تحریکِ جہاد اسلامی، حزب الله لبنان، شہید سید حسن نصرالله اور شیخ نعیم قاسم کی قیادت کو مزاحمت کی روشن مثالیں قرار دیتے ہوئے کہا کہ انصار الله یمن اور دیگر مزاحمتی قوتیں فلسطین کے ساتھ کھڑی ہیں اور عسکری و سفارتی میدانوں میں نمایاں کامیابیاں حاصل کر چکی ہیں۔
امام جمعہ تہران حجت الاسلام علی اکبری نے نوجوان نسل، خصوصاً طلباء کو مخاطب کرتے ہوئے کہا کہ وہ غزہ کے مظلوم شہداء سے سبق لیتے ہوئے اسلامی اقدار اور مزاحمت کے راستے پر قائم رہیں اور جب تک فلسطین مکمل آزادی اور سلامتی حاصل نہ کرلے، مزاحمت کے ساتھ کھڑے رہیں؛ یہی نسل مستقبل میں ایران اور خطے کی آزادی و خودمختاری کی ضامن بنے گی۔
آپ کا تبصرہ